SAĞLAMLIĞINIZI QORUYUN
BERLİN. AFR-in İstehlakçıları Müdafiə İşləri, Kənd Təsərrüfatı və Ərzaq Nazirliyi “Mini-kap celli” markalı jelatin konfetlərinin pərakəndə satışdan və mağazaların anbarlarından yığışdırılması üçün genişmiqyaslı əməliyyata başlamışdır. Nazirliyin nümayəndəsi İTAR-TASS-ın müxbirinə bildirmişdir ki, Almaniyada “qlukomannan” deyilən jelatinin istehsalına və həmin inqredientdən istifadə edilməklə hazırlanan ərzaq məmulatının satışına qadağa qoyulmuşdur.
İstehlakçıları Müdafiə İdarəsinin eksperti xəbərdarlıq etmişdir ki, “Mini-kap celli”nin yarımşəffaf pastilalarının tərkibinə daxil olan “qlukomannan” qidada şirniyyatdan istifadə zamanı yapışqan kimi yuxarı tənəffüs yollarını tıxaya və boğulmaya səbəb ola bilər. Berlin “qlukomannan” istehsalını qadağan etmək qərarı barədə Avropa Birliyinin Brüsseldəki müvafiq orqanlarına da məlumat göndərmişdir.
Ekspertin dediyinə görə, jeleyəoxşar konfetlər Cənub-Şərqi Asiyada ən çox sevilən şirniyyatdır və bütün dünyada onlarca firma tərəfindən istehsal edilir.
VARŞAVA. Polşanın səhiyyə naziri Mariuş Lapinski “təcili yardım” maşınlarının dərman qutusundan “pavulon” preparatının yığışdırılması barədə sərəncam vermişdir.
Nazir bu sərəncamını yanvarın 30-da Lodzda “təcili yardım” həkimlərinə qarşı ittihamlar irəli sürüldükdən sonra imzalamışdır. Həkimlər ağır xəstələri “pavulon” preparatının köməyi ilə öldürməkdə, sonra isə bu barədə özəl dəfn bürolarına məlumat verməkdə ittiham edilirlər. Onlar tabut hazırlayanlardan hər belə xəbərə görə 300-400 dollar alırlarmış.
“Pavulon” kurare zəhəri əsasında hazırlanır və xəstəni “süni ağ ciyərlər”ə qoşmaq üçün onun tənəffüs sistemini “dayandırmaq” lazım gəldikdə işlədilir. Mariuş Lapinskinin sərəncamı “pavulon”u ancaq cərrahiyyə əməliyyatları aparılan xəstəxanalarda saxlamağa, “təcili yardım” həkimləri xəstələrin yanına gedəndə isə daha təhlükəsiz digər preparatlardan istifadə etməyə icazə verir.
x x x
MEXİKO. “Uşaq nə edirsə-etsin, təki ağlamasın” - bu prinsip şirin-şəkər balalarının “pis uşaqlar dəstəsi”nə qoşula biləcəyi küçələrdə veyillənməkdənsə, öz yanlarında olmasını üstün tutan bir çox valideynləri qane edir. Uşağı gözdən qoymamağın ən sadə üsullarından biri isə, məlum olduğu kimi, ona hər hansı bir elektron oyuncaq almaqdır. Amma Meksika Milli Muxtar Universitetinin (MMMU) mütəxəssisləri xəbərdarlıq edirlər ki, bu üsul uşağın formalaşmaqda olan orqanizmi üçün heç də təhlükəsiz deyildir.
MMMU-nun uşaq psixikasının tədqiqi mərkəzinin rəhbəri, pediatr həkim Mariya Rosales jurnalistlərə bildirmişdir ki, ən geniş yayılmış oyuncaqlar böyük kommersiya uğuru qazansa da, uşağın davranışına onların təsiri indiyədək öyrənilməmişdir. Halbuki, elmi mərkəzin apardığı müşahidələrin göstərdiyi kimi, uşaqlar uzun müddət televizorun və ya monitorun qarşısında oturduqdan sonra daha davakar olur, çünki Meksika mağazalarında satılan videooyunların 90 faizindən çoxunda zorakılıq ünsürləri var.
MMMU-nun digər bir əməkdaşı - Norma del Rio istisna etmir ki, ən həris oyunçular gələcəkdə cinayətkar ola bilərlər. Videooyunların süjetlərində xeyirlə şəri bir-birindən fərqləndirmək uşaqlar üçün çox vaxt çətin olur. Bunun nəticəsi isə döyüş filmlərinə tamaşadan sonrakı kimi ola bilər. Məlum olduğu kimi, bu filmlərin gənc nəslə pis təsiri həyatda dəfələrlə təzahür etmişdir.
Elektron oyuncaqların ticarətində özbaşınalığın hökm sürdüyü və onlardan təhlükəsiz istifadəyə dair elmi surətdə əsaslandırılmış tövsiyələrin olmadığı şəraitdə valideynlərin özləri uşaqlar üçün “düzgün” proqramların seçilməsində iştirak etməli və onların yanında oturub, başa salmalıdırlar ki, ekrandakı bütün qəddar səhnələr heç də həqiqi deyildir.
LONDON. Kral Ailənin Sağlamlığı İnstitutunun bir qrup alimi insanların “XX əsrin taunu”na-QİÇS-ə yoluxmasının dinamikasını, bütün dünyada immunitet çatışmazlığı virusuna yoluxmanın güclənməsini və bu xəstəliyin profilaktikasını araşdırmışdır. Onların apardıqları tədqiqatların nəticələrinə dair məruzədə xəbərdarlıq edilir: QİÇS-in yayılması elə bir epidemiyaya çevrilmişdir ki, ölüm hallarının göstəricisinə görə, o, X1V əsrdə 40 milyon insanın ölümünə səbəb olmuş xiyərək (bubon) taunu epidemiyasını çox tezliklə kölgədə qoyacaqdır.
Alimlərin tədqiqatına görə, QİÇS-in aşkara çıxarıldığı vaxtdan bəri ona 65 milyon adam yoluxmuş və bunların 25 milyonu ölmüşdür. Hazırda QİÇS-ə yoluxanların sayı 40 milyonu keçmişdir. Tədqiqatçılar xəbərdarlıq edirlər: “XX əsrin taunu”na qarşı kifayət qədər təsirli dərman olmadığından, bu adamların hamısı çox yaxın gələcəkdə ölümə məhkumdur.
Londonda CAR alimlərinin də hesabatı yayılmışdır. Onlar iddia edirlər ki, QİÇS-ə qarşı təsirli vasitə 7-10 ildən sonra tapılacaqdır.
Bölmənin digər xəbərləri
