Sağlamlıq imkanları məhdud şəxslər tərəfindən toxunulan qış geyimləri hərbi hissəyə təhvil verilib
Naxçıvan, 11 noyabr, AZƏRTAC
Naxçıvanda sağlamlıq imkanları məhdud qadınlar tərəfindən toxunulan isti qış geyimləri hərbi hissəyə təhvil verilib.
AZƏRTAC-ın Naxçıvan bürosu xəbər verir ki, bu münasibətlə keçirilən tədbirdə çıxış edən Naxçıvan Muxtar Respublikası Əmək və əhalinin sosial müdafiəsi naziri Nicat Babayev “2021-2025-ci illərdə Naxçıvan Muxtar Respublikasında əhalinin məşğulluğunun artırılması üzrə Dövlət Proqramı”nın icrası istiqamətində görülən işlərin əhəmiyyətini vurğulayıb. Bildirib ki, cari ildə bu məqsədlə müvafiq tədbirlər təşkil olunub, avqustun 28-də Naxçıvan Muxtar Respublikası Ali Məclisində 2021-2022-ci illərin payız-qış mövsümünə hazırlıq və qarşıda duran vəzifələrlə əlaqədar keçirilmiş müşavirədə verilmiş tapşırığa uyğun olaraq, hərbi hissələr üçün isti qış geyimlərinin toxunması işi davam etdirilib. Bu tədbirlərin davamı olaraq, bu gün məhdud fiziki imkanlı şəxslər tərəfindən toxunmuş 800 yun jilet, 2500 cüt yun corab və 1000 ədəd boyunluq əsgərlərimizə hədiyyə edilir.
Qeyd olunub ki, bu kimi tədbirlər məhdud fiziki imkanlı şəxslərin məşğulluğunu təmin etməklə bərabər onların maddi təminatlarının yaxşılaşmasına da müsbət təsir göstərir. Nazir əlavə edib ki, isti qış geyimləri ilə yanaşı, Naxçıvan Muxtar Respublikası Əmək və Əhalinin Sosial Müdafiəsi Nazirliyinin balansında olan 1 generator da hərbi hissəyə təqdim olunur. Nicat Babayev sosial qayğıya ehtiyacı olan şəxslərə göstərilən yüksək qayğıya görə Naxçıvan Muxtar Respublikası Ali Məclisi Sədrinə dərin minnətdarlığını bildirib.
Daha sonra Əlahiddə Ümumqoşun Ordu Komandanının müavini, general-mayor Elxan Əlibəyov tədbirdə çıxış edərək bildirib ki, Naxçıvanda yerləşən ordu, birləşmə və hissələr hərtərəfli qayğı ilə əhatə olunub. Dövlətimiz tərəfindən göstərilən bu diqqət hərbi qulluqçuların məsuliyyətini daha da artıraraq vətənpərvərlik hisslərini daha da gücləndirir. Dövlət qayğısından və xalq-ordu birliyindən ruhlanan hərbi qulluqçularımız yüksək nizam-intizama və döyüş qabiliyyətinə malikdirlər. Bu gün əsgərlərə isti qış geyimlərinin təqdim edilməsi də növbəti qayğının ifadəsi, xalq-ordu birliyinin təcəssümüdür.
Tədbirdə hərbi qulluqçular göstərilən diqqət və qayğıya görə minnətdarlıqlarını bildiriblər. Çıxışların ardından isti qış geyimləri hərbi hissə və zastavalara təhvil verilib.
Bölmənin digər xəbərləri
