Şamaxıda Azərbaycan Könüllü Təşkilatları İttifaqının birinci konfransı keçirilir
Şamaxı , 16 avqust, AZƏRTAC
Şamaxıda Azərbaycan Könüllü Təşkilatları İttifaqına (AKTİ) üzv təşkilatların rəhbərlərinin, AKTİ katibliyinin və bir sıra rəsmi qonaqların iştirakı ilə birinci hesabat-seçki konfransı keçirilir.
AZƏRTAC-ın bölgə müxbiri xəbər verir ki, öncə Azərbaycanın Dövlət Himni səsləndirilib, torpaqlarımızın azadlığı uğrunda şəhid olanların xatirəsi bir dəqiqəlik sükutla yad edilib. Konfransı giriş sözü ilə moderator Kənan Tağızadə açaraq ölkəmizdə könüllülüyün tarixi aspektləri barədə qısa məlumat verib. Sonra AKTİ-nin birillik fəaliyyətinin təqdimat videosu nümayiş olunub. Təqdimat videosunda hesabat dövründə görülən işlər, həyata keçirilən tədbir və layihələr barədə konfrans iştirakçıları ətraflı məlumatlandırılıb.
Hesabat-seçki konfransında çıxış edən Azərbaycan Respublikası Gənclər Fondunun icraçı direktorunun müavini Qədir Xəlilov, Diasporla İş üzrə Dövlət Komitəsinin şöbə müdiri Yəhya Babanlı, Dövlət Miqrasiya Xidmətinin baş idarə rəisinin müavini Kəyan Hacıyev, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin İnsan resursları və təlim şöbəsinin müdir mavini Cahangir Hacıyev, Təhsil Nazirliyinin Məktəbdənkənar fəaliyyətin təşkili şöbəsinin sektor müdiri Hilal Salmanov, Əmək və Əhalinin Sosial Müdafiəsi Nazirliyinin İctimaiyyətlə əlaqələr və kommunikasiya şöbəsinin müdir müavini Ülvi Qiyasov, Şamaxı Rayon İcra Hakimiyyəti başçısının müavini Mehriban Eyubova öz müstəqilliyini əldə etdikdən sonra könüllülük hərəkatının Azərbaycanda güclü bir qüvvəyə çevrildiyini vurğulayıblar. Qeyd olunub ki, Azərbaycanda könüllülük sahəsində inkişaf ulu öndər Heydər Əliyevin hakimiyyətə qayıdışından sonra başlayıb. 1998-ci ildə Gənclər, İdman və Turizm Nazirliyi, BMT-nin İnkişaf Proqramı və BMT Könüllüləri Proqramının birgə layihəsi fəaliyyətə başlayıb. 1998-2000-ci illərdə bu proqram nəticəsində Azərbaycanda güclü könüllü komandası yaradılıb və könüllülük prinsiplərinin geniş auditoriyaya təbliğinə start verilib.
Çıxışlarda vurğulanıb ki, 2012-ci il Avroviziya, 2015-ci il Avropa Oyunları, 2016-cı ildən keçirilən Formula 1 yarışları, Dünya Şahmat Olimpiadası, Avropa Gənclər Olimpiya Festivalı kimi beynəlxalq tədbirlərdə aktiv iştirak etməklə öz bacarıqlarını və yaradıcılığını nümayiş etdirərək Azərbaycanda idman könüllülüyünün ən yüksək səviyyədə inkişafına səbəb oldular. ASAN xidmət tərkibində yaranan könüllülük proqramı dövlət orqanlarında könüllülüyün əsasını qoyub. Prezident İlham Əliyev Azərbaycan gəncliyinə növbəti dəstəyini nümayiş etdirərək “Azərbaycan Respublikasında 2020-ci ilin “Könüllülər ili” elan edilməsi haqqında” Sərəncam imzalayıb. Gənclərin fərdi inkişafına təkan vermək, onlarda sosial məsuliyyət hissini artırmaq, könüllülük fəaliyyətinin təşviqi məqsədilə dövlətimiz tərəfindən atılan zəruri addımlar bu gün öz müsbət nəticəsini verir. Pandemiya dövründə könüllülərin fəaliyyəti. AKƏM-in təsis olunması. AKƏM çərçivəsində həyata keçirilən aksiyalar bunun bariz nəticəsidir.
Diqqətə çatdırılıb ki, “Böyüklərimizi qoruyaq!” devizi altında respublikanın 35 şəhər və rayonunda 375 nəfər könüllü 11.377 tənha yaşayan ahılların, aztəminatlı ailələrin, eyni zamanda, şəhid ailələrinin, fiziki məhdudiyyəti olan şəxslərin evlərinə baş çəkib, onlara müxtəlif ərzaq məhsullarında ibarət bağlamaların çatdırılmasında kömək göstəriblər. Habelə “Könüllü Qonşu” aksiyası çərçivəsində ümumilikdə ölkənin 45 şəhər və rayonundan 300 nəfərə yaxın gənc bu təşəbbüsə qoşulub.
Azərbaycan Könüllülərinin Əlaqələndirmə Mərkəzi Milli Hematologiya və Transfuziologiya Mərkəzinin - Qan Bankının birlikdə başladığı “Könüllü Donor” aksiyası çərçivəsində Qan Bankının paytaxt və regionlarda yerləşən bölmələrinə könüllülər də daxil olmaqla 2125 nəfər könüllü donordan qan götürülüb və ümumilikdə 3010 nəfər xəstəyə qan köçürülüb.
Könüllülərin müharibə dövründəki fəaliyyətindən danışılaraq sosial şəbəkələrdəki fəaliyyətin koordinasiya olunmasından, Mətbuat Səngəri layihəsi ilə könüllülərin tviter və feysbuk kimi böyük sosial media platformaları üzərindən informasiya müharibəsinə cəlb olunduqlarından bəhs olunub. Bu məqsədlə könüllülərə müxtəlif təlimlər keçirilib. Könüllülər müxtəlif həştəqlərdən istifadə etməklə Qarabağ həqiqətləri ilə bağlı məlumatları bütün dünyaya yaymağa müvəffəq olublar.
Çıxışlarda dövlətimizin gənclərə göstərdiyi diqqət və qayğıdan da ətraflı bəhs olunub. Azərbaycan Prezidenti İlham Əliyevin müvafiq göstərişi və sosial həssas kateqoriyadan olan tələbələrin təhsil haqqından azad edilməsi, həmçinin yeni növ koronavirus pandemiyası ilə əlaqədar minlərlə tələbənin təhsil xərclərinin dövlət tərəfindən ödənilməsi məhz bu qayğının nəticəsidir. Qərar 20 mindən artıq tələbəni əhatə edib. Qərarın icrası üçün dövlət büdcəsindən 40 milyon manat maliyyə vəsaiti ayrılıb.
Vurğulanıb ki, könüllülük fəaliyyətinin inkişafına göstərilən yüksək diqqət və qayğı, bu sahədə əldə olunan nailiyyətlər və könüllülərin ölkəmizin inkişafında əvəzsiz xidmətləri qarşıdakı dövrdə daha böyük uğurların qazanılacağını deməyə əsas yaradır. Azərbaycan könüllüsü hər zaman öz həmrəyliyi, mehribanlığı, qayğı və sevgi dolu fəaliyyəti ilə fərqlənməyi bacarıb.
Hesabat-seçki konfransının birinci gününün sonunda il ərzində AKTİ-nin uğurlu fəaliyyətində dəstək olan qurumlara, şəxslərə və medialara təşəkkürnamə (plaket) təqdim olunub.
Sabah konfrans öz işini davam etdirəcək.
Bölmənin digər xəbərləri
