“Screen International” jurnalının üz qabığı Azərbaycana həsr olunub
Bakı, 13 may, AZƏRTAC
Böyük Britaniyanın kino sahəsində aparıcı beynəlxalq nəşrlərindən olan “Screen International” jurnalının may buraxılışının üz qabığı Azərbaycana həsr edilib.
Bu barədə AZƏRTAC-a Mədəniyyət Nazirliyindən məlumat verilib.
Bildirilib ki, jurnalın üz qabığında Azərbaycanda kino istehsalı sahəsində aparılan islahatların nəticələrindən biri olan geri ödəniş (cash rebate) mexanizmi ilə bağlı informasiya verilib.
Azərbaycan Respublikası Nazirlər Kabinetinin 2025-ci il 4 iyul tarixli Qərarına əsasən, ölkə ərazisində film istehsalı üçün mal, iş və xidmətlərin alınmasına çəkilmiş xərclərin 25 faizi istehsalçıya geri qaytarılır. Bundan başqa, mədəniyyətimizin təbliği üçün müəyyən edilmiş meyarların azı üçünə cavab verdikdə çəkilmiş xərclərin daha 15 faizi istehsalçıya geri ödəniləcək. Beləliklə, istehsalçı şirkət xərclərinin 40%-ə qədərini geri ala biləcək. Bunu əsas götürərək jurnal Azərbaycanın xarici film istehsalçılarının sevimli məkanına çevriləcəyini bəyan edir.
Jurnalın may buraxılışı 79-cu Kann Film Festivalına həsr edilib. Hazırda Azərbaycan bu festivalda milli stendlə təmsil olunur.
Onu da bildirək ki, əsası 1889-cu ildə qoyulan “Screen International” jurnalı 1975-ci ildən indiki adı ilə nəşr olunur.
Bölmənin digər xəbərləri
