Səfər Mehdiyev: Vətən müharibəsində gömrükçülər üzərlərinə düşən vəzifələri layiqincə yerinə yetirməyə çalışıblar
Bakı, 6 noyabr, AZƏRTAC
Noyabrın 5-də Dövlət Gömrük Komitəsində (DGK) Zəfər Gününə həsr olunan tədbir keçirilib.
Komitənin Mətbuat və İctimaiyyətlə Əlaqələr İdarəsindən AZƏRTAC-a bildirilib ki, mərasimdə Komitə rəhbərliyi, Vətən müharibəsi şəhidlərinin ailə üzvləri və qazilər iştirak ediblər.
Öncə Vətən uğrunda canından keçən qəhrəman övladların - bütün şəhidlərin əziz xatirəsi bir dəqiqəlik sükutla yad olunub və Azərbaycan Respublikasının Dövlət Himni səslənib. Vətən müharibəsinə həsr olunan videoçarx təqdim edilib.
Mərasimdə giriş nitqi ilə çıxış edən DGK-nin sədri, gömrük xidməti general-polkovniki Səfər Mehdiyev tarixi Qələbəmizin birinci ildönümü ərəfəsində şəhid ailələri və qazilər ilə görüşün Komitənin kollektivi üçün böyük fəxr olduğunu bildirib.
Komitə sədri vurğulayıb ki, Vətənin dar günündə tərəddüd etmədən onun müdafiəsinə atılan və öz doğmalarını iftixarla cəbhəyə yola salan vətəndaşlar qürur mənbəyimizdir və yalnız onların sayəsində Azərbaycan xalqı bir daha tarixin çətin sınağından alnıaçıq, üzüağ çıxdı.
Vətən müharibəsinin Azərbaycan tarixinə qızıl hərflərlə yazıldığını qeyd edən Səfər Mehdiyev bildirib ki, beynəlxalq aləm müharibənin ilk günlərindən Müzəffər Ali Baş Komandan İlham Əliyevin rəhbərliyi ilə dövlətimizin qətiyyəti, Azərbaycan əsgərinin rəşadəti və xalqımızın birliyinin şahidi oldu. Ordumuz 28 il düşmən tapdağında qalan torpaqları 44 günə geri qaytardı.
Komitə sədri onu da deyib ki, Vətən müharibəsinin ilk günlərindən gömrükçülər də istər arxa, istərsə də ön cəbhədə üzərlərinə düşən vəzifələri layiqincə yerinə yetirməyə çalışıblar. Minlərlə gömrük əməkdaşı könüllü olaraq ordu sıralarına yazılıb, onlardan 60 nəfəri döyüşlərdə iştirak edib, bir nəfər gömrük əməkdaşı Ülvi Hacıyev isə şəhidlik zirvəsinə yüksəlib.
“Əlbəttə, qısa zaman kəsiyində əldə olunan Qələbə asan başa gəlmədi. 3 minə yaxın vətən övladı qəhrəmancasına şəhid oldu. Yüzlərlə əsgər və zabitimiz müxtəlif dərəcəli bədən xəsarətləri aldı, sağlamlığını itirdi”, - deyə Səfər Mehdiyev əlavə edib ki, Zəfər Gününü, Qələbə sevincini Müzəffər Ali Baş Komandanın rəhbərliyi ilə həmin insanlara borcluyuq.
Bildirilib ki, bu gün dövlətimiz, onun rəhbəri Prezident İlham Əliyev, Birinci vitse-prezident Mehriban Əliyeva tərəfindən şəhidlərin əziz xatirəsinin əbədiləşdirilməsi, şəhid ailələrinin, qazilərimizin hərtərəfli qayğı ilə əhatə olunması, onların sosial-məişət problemlərinin həlli üçün bütün zəruri tədbirlər həyata keçirilir. Komitə də bu istiqamətdə 44 nəfər şəhid ailəsi üzvləri və qazilərimizin daimi işlə təmin olunması üçün addımlar atıb.
Sədr gömrük xidmətinə qəbul olunan həmin şəxslərlə bir arada, çiyin-çiyinə çalışmağın böyük şərəf olduğunu deyib, onlara uğurlar arzulayıb.
Gömrük orqanlarına işə qəbul olunanlar adından çıxış edən Vətən müharibəsi iştirakçıları - İlqar Əliyev və İqbal Səfərov Müzəffər Ali Baş Komandan İlham Əliyevə göstərilən diqqət və qayğıya görə minnətdarlıqlarını bildiriblər, dövlətin iqtisadi müstəqilliyinin keşiyində duran gömrük orqanlarında xidmətdən daim qürur duyacaqlarını və bu yolda da öz səylərini əsirgəməyəcəklərini vurğulayıblar.
Daha sonra Səfər Mehdiyev gömrük xidmətinə qəbul olunan şəhid ailəsi üzvü və qazilərə rütbə və vəsiqələr təqdim edib.
Sonda şəhid və qazilərin valideynləri adından çıxış edənlər şəhidlərimizin qanının yerdə qalmadığını, tarixi bir Qələbənin qazanıldığını və bu Qələbədə hər bir əsgərin Vətən qarşısındakı borcunu şərəflə yerinə yetirdiyini söyləyiblər. Onlar şəhid ailələrinə, qazilərə xalqımızın və dövlətimizin qayğısından razı qaldıqlarını ifadə ediblər.
Bölmənin digər xəbərləri
