SƏHİYYƏ NAZİRLİYİNİN KOLLEGİYASINDA TİBB MÜƏSSİSƏLƏRİNİN QIŞ MÖVSÜMÜNƏ HAZIRLIĞI MÜZAKİRƏ OLUNMUŞDUR

10.07.2006 [22:19]
Çap et
A⁺ A^-

Səhiyyə Nazirliyi Kollegiyasının iyulun 10-da keçirilən iclasında ölkəmizin tibb müəssisələrinin qarşıdakı qış mövsümünə hazırlığı müzakirə olunmuşdur. Nazirliyin mətbuat xidmətindən AZƏRTAC-ın müxbirinə bildirmişlər ki, nazir Oqtay Şirəliyev çıxışında ölkəmizin başçısı İlham Əliyevin qış mövsümünə hazırlıq prosesinə xüsusi diqqət yetirdiyini vurğulamış və ötən il istiliklə təmin olunmuş tibb müəssisələrinin sayını göstərən rəqəmlər gətirmişdir. Ötən il qazanxanalar təmir edilmiş və bəzi elmi tədqiqat institutlarına, Təbabət Muzeyinə, elmi-tibb kitabxanasına və bəzi digər təşkilatlara istiliyin verilməsi bərpa olunmuşdur. Lakin Bakı Baş Səhiyyə İdarəsinin tabeliyində olan 70 müəssisədə texniki xarakterli müxtəlif səbəblərə görə qızdırıcı sistemi yoxdur.

Nazir tibb müəssisələrinin rəhbərlərinə qış mövsümünə hazırlıqla əlaqədar problemlərlə daha məsuliyyətlə məşğul olmağı tapşırmışdır.

İclasda vətəndaşların şikayətləri ilə bağlı vəziyyət də müzakirə olunmuşdur. Son yarım ildə nazirliyə daxil olan 6500 şikayətdən təxminən 2 mini müalicədə, diaqnostikada yol verilən nöqsanlara aiddir. Nazir xəstəxanaların ərazilərində apteklərin fəaliyyət göstərməsinin yolverilməzliyini, poliklinikalarda aparılan dezinfeksiya işlərinə diqqətin artırılmasının vacibliyini vurğulamışdır. O.Şirəliyev onu da bildirmişdir ki, yoxlamalar zamanı əlavə qazanc məqsədi ilə xəstələri qəsdən özəl klinikalara göndərən dövlət tibb müəssisələrinin həkimləri ilə əlaqədar faktlar aşkara çıxarılmışdır və həmin həkimlər cəzalandırılacaqdır.

SƏHİYYƏ NAZİRLİYİNİN KOLLEGİYASINDA TİBB MÜƏSSİSƏLƏRİNİN QIŞ MÖVSÜMÜNƏ HAZIRLIĞI MÜZAKİRƏ OLUNMUŞDUR

MÜƏLLİFLƏ ƏLAQƏ

Bölmənin digər xəbərləri