ŞƏKİ İLƏ TANIŞLIQ BEYNƏLXALQ KONFRANS İŞTİRAKÇILARININ ÜRƏYİNCƏ OLDU
Şəhərlə tanışlıq Şərq memarlığının incilərindən olan Şəki xanlarının sarayı ilə başlandı. Qonaqları səmimi salamlayan Şəki Şəhər İcra Hakimiyyətinin başçısı Nazim İbrahimov dünyanın 20-dən çox ölkəsinin tanınmış alimlərinin qatıldığı beynəlxalq konfrans iştirakçılarının bölgələrə səfər proqramına məhz qədim Şəkinin də daxil edilməsindən məmnun qaldığını bildirdi.
Sarayla tanışlıq, verilən ətraflı məlumat qonaqların böyük marağına səbəb oldu.
Abidə ilə tanışlıqdan sonra qonaqlar sarayın həyətində çay süfrəsi ətrafında yerli musiqiçilərin və xanəndələrin ifasında muğamlara, xalq mahnılarını, el havalarını dinlədilər, rəqs etdilər, xatirə şəkilləri çəkdirdilər.
Sonra qonaqlar Şəki Dövlət Tarix və Memarlıq Qoruğunun ərazisində yerləşən Xalq tətbiqi sənəti və Tarix-diyarşünaslıq muzeylərinə baş çəkdilər. Qonaqlara məlumat verildi ki, Xalq tətbiqi sənəti muzeyi V-VI əsrlərə aid memarlıq abidəsi olan Dairəvi məbəddə yerləşir. Muzeydə 500-dən artıq eksponat, o cümlədən yerli sənətkarların əl işləri - şəbəkə, təkəlduz, xalçaçılıq, papaqçılıq, dulusçuluq, misgərlik nümunələri nümayiş etdirilir.
Tarix-diyarşünaslıq muzeyi ilə tanışlıq da qonaqların böyük marağına səbəb oldu.
Daha sonra qonaqlar XVIII əsrə aid memarlıq abidəsi Yuxarı karvansaranın həyətində yerli musiqiçilərdən ibarət kamera ansamblının ifasında Avropa və Azərbaycan bəstəkarlarının klassik əsərlərini dinlədilər. Dahi Üzeyir Hacıbəyovun “Arşın mal alan” musiqili operettasından Əsgərin ariyası isə sürəkli alqışlarla qarşılanmışdır. Karvansarada qonaqlara Şəki ilə bağlı xatirə hədiyyələri - kəlağayı, kitab və bukletlər təqdim olundu.
Günortadan sonra konfrans iştirakçıları erkən orta əsrlərdə Qafqaz Albaniyasında xristianlığın mərkəzlərindən olan Kiş kəndinə gələrək, qədim alban məbədi ilə tanış oldular. Orta əsrlərə aid qəbirlər, bu ərazidə tapılmış maddi-mədəniyyət nümunələri, Qafqaz Albaniyasının tarixi xəritəsi, məbədin həyətində qədim dövrlərin memarlıq abidələrinə aid xüsusi guşələr, maketlər qonaqlarda böyük maraq doğurdu.
Şəkiyə səfərlə bağlı təəssüratlarını AZƏRTAC-ın müxbiri ilə bölüşən professor Nil Sarı (İstanbul Universiteti) burada gördüklərinə, şəkililərin qonaqpərvərliyinə, səmimiliyinə, şirin ləhcələrinə heyranlılığını gizlətmədi, Şəki xanları sarayının gözəlliyinə vurulduğunu bildirərək, onu dünyanın ən məşhur abidələri ilə müqayisə etdi.
Azərbaycan Tibb Tarixçiləri Birliyinin prezidenti, professor Fərid Ələkbərli isə konfransın yekunları və Şəki səfəri barədə dedi:
“Bakı konfransında 20-dən çox ölkənin nümayəndələri, dünya şöhrətli alimlər Azərbaycanın qədim mədəni irsi ilə, o cümlədən qədim əlyazmalarımızla yaxından tanış oldular. Şübhəsiz ki, onlar vətənlərinə dönəndən sonra bizi daha çox təbliğ edəcəklər. Deməli, Azərbaycan mədəniyyəti bütün dünyaya yayılacaq, daha da məşhurlaşacaqdır.
Biz konfrans iştirakçılarını bölgələrimizlə ona görə tanış edirik ki, onlar görsünlər ki, elmi, mədəni və ictimai həyat yalnız Bakıda deyil, əyalətlərdə də eyni inkişaf edir. Biz dünən Yevlax şəhərində Heydər Əliyev Fondunun nümayəndəliyində konfransın növbəti iş gününü uğurla başa çatdırdıq. İndi isə Şəkinin qonağıyıq. Nəyə görə məhz Şəkini seçdik? Çünki Şəki Azərbaycanın ən qədim şəhərlərindən biridir, memarlıq və tarixilik baxımından böyük əhəmiyyət kəsb edir. Şəki xanlarının sarayı səviyyəsində memarlıq abidələri Azərbaycanda çox azdır. Eləcə də, Kiş məbədi ən qədim alban məbədlərindən biridir. Bu, bizim bütün dinlərə hörmətimizdən, dözümlülüyümüzdən irəli gəlir. Ümumiyyətlə, Şəki tarixi-memarlıq baxımından bütöv bir kompleks kimi çox əhəmiyyətli və maraqlı şəhərdir. Qonaqlarımız bu şəhərdən zəngin təəssüratla və xoş ovqatla qayıdırlar.
Qonaqlar konfransın işindən, keçirilən görüşlərdən çox razıdırlar. Onlar konfransın təşkilatçılarına, xüsusilə də Heydər Əliyev Fondunun prezidenti Mehriban xanım Əliyevaya dərin minnətdarlıqlarını bildirirlər. Qeyd edirlər ki, son 10-15 ildə müxtəlif ölkələrdə onlarca beynəlxalq konfransda iştirak etmişlər. Bakı konfransı istər təşkilatçılıq baxımından, istərsə də yüksək elmi səviyyəsinə, qonaqpərvərliyinə görə əvvəlkilərdən tam fərqlənir. Bu, sözsüz ki, Azərbaycanın xeyrinədir və ölkəmiz həqiqətən də dünyanın inkişaf etmiş və aparıcı dövlətlərindən biridir.
Bölmənin digər xəbərləri
