ŞƏKİDƏ TƏBİİ FƏLAKƏTİN NƏTİCƏLƏRİ ARADAN QALDIRILIR
Rayon Fövqəladə hallar komissiyasından AZƏRTAC-ın müxbirinə bildirmişlər ki, ən çox zərər çəkmiş Baş Göynük və Köndələn kəndlərində vəziyyət hələ də gərgin olaraq qalır. Şin çayının daşması nəticəsində həmin kəndlərə güclü sel düşmüş, həyətlər, əkin sahələri və kəndarası yollar qalın lil təbəqəsi altında qalmış, su və elektrik xətləri sıradan çıxmışdır. Ərazinin lildən təmizlənməsi və bərpa işlərinin aparılmasına kömək məqsədi ilə rayona ezam olunmuş respublika Mülki Müdafiə Qüvvələrinin 30 nəfərlik dəstəsi, Meliorasıya və Su Təsərrüfatı Komitəsinin mütəxəssisləri yerli qüvvələrlə birlikdə fasiləsiz çalışırlar. Həyata keçirilmiş tədbirlər nəticəsində Şin çayı artıq öz məcrasına qaytarılmış və sahilbərkitmə işlərinin aparılmasına başlanılmışdır. Təbii fəlakətlə üzləşmiş kəndlərin böyük əksəriyyətinə elektrik enerjisinin verilməsinə başlansa da, Baş Göynük və Köndələn kəndlərində elektrik xətlərinin bərpası hələ də davam edir. Baş verə biləcək yoluxucu xəstəliklərin qarşısının alınması üçün rayonun həkim briqadaları və sanitar işçiləri əhaliyə lazımi tibbi yardım göstərir, peyvəndlər aparırlar.
Respublika Fövqəladə Hallar üzrə Komissiyanın nümayəndələri rayon rəhbərliyi və yerli mütəxəssislərlə birlikdə dəymiş zərərin həcmini müəyyənləşdirirlər. Mütəxəssislərin ilkin hesablamalarına görə, təbii fəlakət nəticəsində rayona dəymiş zərərin həcmi 5 milyard manata yaxındır.
