SƏNAYE VƏ ENERGETİKA NAZİRLİYİ MAYE QAZDOLDURMA MƏNTƏQƏLƏRİNİN FƏALİYYƏTİNİ ARAŞDIRIR
AZƏRTAC xəbər verir ki, Nazirlər Kabinetinin 2007-ci il 7 iyun tarixli 91 saylı qərarı ilə təsdiq edilmiş “Dövlət Qaz Nəzarəti haqqında Əsasnamə”yə uyğun olaraq Azərbaycan Respublikası Dövlət Qaz Nəzarət İdarəsinin müfəttişləri tərəfindən ölkə ərazisində fəaliyyət göstərən maye qazdoldurma məntəqələrindəki vəziyyət araşdırılmışdır.
Bu araşdırmalar zamanı qaz təchizatı sahəsində, maye qazın satışında, qaz resurslarından səmərəli və etibarlı istifadənin təmin edilməsində müvafiq qanunların, normativ hüquqi aktların, mövcud istismar, qazdan istifadə qaydalarının və təlimatların tələblərinə əməl olunmasının vəziyyəti yoxlanılmışdır. Müəyyən edilmişdir ki, Sabirabad rayonu Qaratəpə kəndində Abbasov Nadir Əvəz oğluna məxsus maye qazdoldurma məntəqəsi Sənaye və Energetika Nazirliyindən qaz məhsullarının satışına dair lisenziya almadan fəaliyyət göstərir.
Həmçinin, Quba şəhəri 20-ci məhəllə, 223-cü Atıcı diviziya küçəsində Əliyev Hidayət Seyfəl oğluna məxsus, Sabirabad şəhəri A.Səhhət küçəsində Bağırov Məmmədbağır Məhəmməd oğluna məxsus, Saatlı şəhəri 20-ci məhəllə, Azərbaycan xiyabanında yerləşən Həsənov Oruc Yüzbaşı oğluna məxsus maye qazdoldurma məntəqələrinin fəaliyyətində ciddi qanun pozuntuları aşkar edilmişdir. Məlum olmuşdur ki, həmin maye qazdoldurma məntəqləri layihəyə uyğun gəlmir, maye qazın satışının bir hissəsi sayğacsız aparılır, istismar olunan sayğaclar növbəti dövlət yoxlamasından keçirilməmiş və ya Dövlət reyistrinə salınmamışdır.
Dövlət Qaz Nəzarəti İdarəsinin müfəttişləri tərəfindən yuxarıda göstərilən nöqsan və çatışmazlıqların aradan qaldırılması barədə müvafiq göstəriş və tələbnamələr verilmişdir.
Bölmənin digər xəbərləri
