“ŞƏNGÜLÜM, ŞÜNGÜLÜM” BALACALARIN QONAĞI OLMUŞDUR
Bakı, 27 oktyabr (AZƏRTAC). Oktyabrın 27-də Abdulla Şaiq adına Dövlət Kukla Teatrı Bakının Nizami rayonundakı 59 saylı körpələr evi-uşaq bağçasının qonağı olmuşdur. Bakı Şəhəri Gənclər və İdman Baş İdarəsinin (BŞGİBİ) “Uşaq ili-2009” layihəsi çərçivəsində təşkil etdiyi tədbirdə teatrın kollektivi balacalara Əyyub Abbasovun eyniadlı əsəri əsasında “Şəngülüm, Şüngülüm” nağıl-tamaşasını göstərmişdir. Xeyirin Şər üzərində qələbə çalmasına əsaslanan əsərin nümayişi zamanı balaca tamaşaçılar sevimli nağıl qəhrəmanlarını alqışlarla qarşılamışlar.
Nizami rayon Gənclər və İdman İdarəsinin rəisi Qiyas Nəcəfov və BŞGİBİ əməkdaşlarının iştirak etdiyi tədbirdə bildirilmişdir ki, balacaların zövqünün və hisslərinin formalaşmasına yardımçı olan belə tədbirlər bundan sonra da silsilə şəklində davam etdiriləcəkdir.
Sonda bağçadaxili yarışlarda qalib gəlmiş uşaqlara hədiyyələr verilmişdir.
Bölmənin digər xəbərləri
