SENTYABRDA AZƏRBAYCAN TARİXİNƏ DAİR TELEMARAFON KEÇİRİLƏCƏKDİR

11.07.2006 [16:04]
Çap et
A⁺ A^-

Demokratik Cəmiyyətin İnkişafına Yardım İctimai Birliyi bu ilin sentyabrında alim və mütəxəssislərin, iş adamlarının iştirakı ilə Azərbaycan tarixinin araşdırılması, xalqa və dünya ictimaiyyətinə düzgün çatdırılması problemlərinə həsr olunmuş telemarafon keçirəcəkdir.

AZƏRTAC xəbər verir ki, birliyin təsisçisi Əsgər Məmmədov bununla əlaqədar iyulun 11-də Beynəlxalq Mətbuat Mərkəzində kütləvi informasiya vasitələri üçün mətbuat konfransı keçirmişdir. O, məqsədi Azərbaycanda və onun hüdudlarından kənarda yaşayan, Azərbaycanla bağlı şəxslərin peşəsindən və siyasi baxışlarından asılı olmayaraq onların arasında ünsiyyət yaratmaq olan qurum barədə qısa məlumat vermiş, konfrans iştirakçılarından telemarafonun təşkili ilə bağlı təkliflərini bildirməyi xahiş etmişdir.

Filologiya elmləri doktoru, professor İsmayıl Vəliyev, yazıçı Xaqani İsmayıl, tarixçi Səməd Bayramzadə, “Russki Mir” İctimai Birliyinin sədri Valentin Kulik, Azərbaycandakı kazakların atamanı Viktor Mereşkin və başqaları marafonun keçirilməsini alqışlamış, təkliflər irəli sürmüşlər.

Ə.Məmmədov və birliyin digər səlahiyyətliləri jurnalistləri maraqlandıran suallara cavab vermişlər.