Serbiyada komendant saatının ləğvi məsələsi müzakirə olunacaq
Belqrad, 4 may, AZƏRTAC
Serbiya hökuməti fövqəladə vəziyyəti ləğv edərək, koronavirus pandemiyası səbəbindən tətbiq olunan bir sıra məhdudiyyətləri mayın 4-dən aradan qaldırıb.
AZƏRTAC xəbər verir ki, ölkə üzrə şəhərlərarası avtobuslar, habelə Novi Sad və Kragujevac şəhərlərində şəhərdaxili nəqliyyat tam bərpa olunub. Belqrad və Nişdə isə nəqliyyatın mayın 8-dən bərpa olunacağı planlaşdırılıb.
Serbiyanın paytaxtı Belqradda kafe və restoranlar da bu gündən tədricən açılıb. Ölkə rəhbərliyi restoranda müştərilər arasında sosial məsafəni saxlamağı, mümkün olarsa şəffaf arakəsmələri tövsiyə edib.
Komendant saatının tam ləğvinə isə mayın 6-da parlamentin növbəti iclasında qərar veriləcək. Mayın 18-dən isə beynəlxalq uçuşların bərpa olunacağı gözlənilir.
Koronavirus pandemiyası ilə əlaqədar fövqəladə vəziyyət martın 15-də tətbiq edilmişdi. Komendant saatı isə martın 18-dən qüvvəyə minmişdi.
Ölkədə 9,5 mindən çox COVID-19 xəstəsi aşkarlanıb ki, bunlardan da 193-ü ölüb.
Aygün Əliyeva
AZƏRTAC-ın xüsusi müxbiri
Belqrad
Bölmənin digər xəbərləri
