Səudiyyə Ərəbistanı ilə Livan arasında diplomatik gərginlik yaranıb
Qahirə, 30 oktyabr, AZƏRTAC
Səudiyyə Ərəbistanı Beyrutdakı səfirini məsləhətləşmələr üçün geri çağırıb və Livanın Krallıqdakı səfirinin 48 saat ərzində ölkəni tərk etməsini tələb edib. Eyni zamanda, Ər-Riyad Livan mallarının idxalına qadağa qoyub.
AZƏRTAC rəsmi SPA agentliyinə istinadla xəbər verir ki, iki ölkə arasında yaranmış diplomatik gərginliyin səbəbi Livanın informasiya naziri Corc Kordahinin qiyamçı husiləri müdafiə etməsi və Yəməndəki müharibəni “mənasız” adlandırması olub. Livan rəsmisi bu müharibəni Səudiyyə Ərəbistanının “təcavüzü” kimi qiymətləndirib.
Agentliyin xəbərində qeyd olunub ki, Səudiyyə Ərəbistanı dəfələrlə Livan hökumətindən narkotik vasitələrin Körfəz ölkələrinə göndərilməsini dayandırmağı tələb edib. Rəsmi Ər-Riyad təəssüflə qeyd edib ki, bu cür hərəkətlər iki ölkə arasında yaxşı münasibətlərə zərər vurur. Krallıq bildirib ki, bu problemlərə baxmayaraq, Səudiyyə Ərəbistanında məskunlaşmış livanlıları qardaş xalqın nümayəndələri hesab edir və onların mənafeləri qorunur.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
