SİNOPTİKLƏR GÜRCÜSTANDA YAĞIŞLARIN 4 GÜN DAVAM EDƏCƏYİNİ PROQNOZLAŞDIRIRLAR
AZƏRTAC-ın xüsusi müxbiri xəbər verir ki, son günlər aramsız yağan yağışlar Gürcüstanın bütün bölgələrinə ciddi ziyan vurmuşdur.
Üzümlüklərə dolu düşmüş, əkin sahələrini və evləri su basmış, mal-qara tələf olmuşdur. Təbiətin şıltaqlığından ən çox Acarıstan Muxtar Vilayəti və ölkənin Kaxeti bölgəsi ziyan çəkmişdir. Həmin ərazilərdə təbii fəlakət 8 nəfərin həyatına son qoymuşdur.
Sentyabrın 28-də yağan leysan yağışlar nəticəsində Acarıstan Muxtar Vilayəti Kobuleti rayonunun Xalvaşi kəndində torpaq sürüşməsindən daha 6 nəfər həlak olmuşdur. Geoloqlar, ümumiyyətlə, rayonun 18 kəndinin təhlükəli zonada yerləşdiyini bildirmişlər. Ötən gün qərbi Gürcüstanın liman şəhəri Potidə evlərin birinci mərtəbəsini su basmış, nəqliyyatın hərəkəti dayanmışdır. Leysan yağışlar Qoridəki çadır şəhərciyində məskunlaşan qaçqınlar üçün də problem yaratmışdır. Sinoptiklərin məlumatına görə, leysan yağışlar daha 4 gün - cümə gününədək davam edəcəkdir.
Gürcüstan hökumətinin göstərişi ilə təbii fəlakətdən ziyan çəkənlərə yardım məqsədi ilə sentyabrın 29-dan etibarən bölgələrdə xüsusi qruplar fəaliyyətə başlamışdır.
Bölmənin digər xəbərləri
