Sinqapur alimləri xərçəngə qarşı universal preparat hazırlayıblar
Bakı, 21 iyul, AZƏRTAC
Hər il dünyada 8,2 milyon adam xərçəngdən vəfat edir. Sinqapur alimləri xərçəngə qarşı universal preparat hazırlayıblar. “ETC-159” preparatı bu ölkədə hazırlanan və lazımi sınaqlardan keçən xərçəngə qarşı ilk vasitədir.
AZƏRTAC xarici KİV-lərə istinadla xəbər verir ki, hazırda kliniki tədqiqatlar aparılır. Preparat uğurla sınaqdan keçsə, dünya onkoloji xəstəliklərin müalicəsi üçün yeni təsirli vasitə əldə edəcək.
“ETC-159” bağırsaq, yumurtalıqlar, mədəaltı vəzi xərçənginə qarşı təsirlidir. Sadalanan bütün xərçəng növlərini bir mexanizm - Wnt hüceyrə siqnal yolları birləşdirir. Bu yollar fəallaşanda, xərçəng hüceyrələrinin artma və yayılma imkanları da çoxalır. Hazırda preparatın təhlükəsizliyini qiymətləndirmək üçün klinik sınaqların birinci fazası keçirilir. Sınaq qrupuna 58 xərçəng xəstəsi daxildir.
Qeyd edək ki, xərçəng Sinqapurda ölüm hallarının əsas səbəblərindən biridir. Ölkədə hər üç ölüm faktından biri xərçənglə bağlıdır.
Bölmənin digər xəbərləri
