SİNQAPURDA SİAM ƏKİZLƏRİNİ AYIRACAQLAR
İnformasiya kanallarının yaydığı xəbərə görə, Sinqapur cərrahları iyulun 6-da başları bitişik iranlı əkiz bacıları bir-birindən ayırmaq üçün nadir əməliyyata başlamışlar. Ladan və Laleh Bicani bacılarının yaşı, - onların 29 yaşı var, - onsuz da çox mürəkkəb olan bu əməliyyatı daha da çətinləşdirir. Əvvəllər bu cür əməliyyatlar, əsasən, körpə uşaqlar üzərində aparılırdı. Əməliyyatı neyrocərrah, professor Keytx Qonun başçılığı ilə 12 cərrah aparır. Onların 6-sı əcnəbi, o cümlədən yaponiyalıdır. Bacıların beyinləri bir kəllədədir və beyinin bir mühüm vena damarı ümumidir. Əməliyyat uğurlu keçsə, sonrakı bir neçə gün həlledici olacaqdır. Belə ki, tromb yaranması və infeksiya düşməsi təhlükəsi vardır. Əməliyyat əkizlərin xüsusi masada oturduğu vəziyyətdə aparılır. Onlar iki, bəlkə də, üç sutka bu vəziyyətdə qalmalı olacaqlar. Əməliyyatın qiyməti 280 min dollardan çoxdur. Sinqapur bütün xərcləri öz öhdəsinə götürür. Sinqapur həkimləri 2001-ci ilin aprelində başları bitişik nepallı qızları bir-birindən ayıra bilmişlər. Lakin indikindən fərqli olaraq, onlar cəmi on bir aylıq idilər.
Bölmənin digər xəbərləri
