“Siqareti yox, sağlamlığı seç” mövzusunda maarifləndirici tədbir keçirilib
Bakı, 23 noyabr, AZƏRTAC
Səhiyyə Nazirliyinin İctimai Səhiyyə və İslahatlar Mərkəzi (İSİM) tərəfindən Bakı Slavyan Universiteti nəzdində məktəb-lisey kompleksində “Siqareti yox, sağlamlığı seç” mövzusunda maarifləndirici tədbir keçirilib.
AZƏRTAC İSİM-in rəsmi instaqram səhifəsinə istinadla bildirir ki, tədbirin keçirilməsində məqsəd gənc nəsil arasında sağlam həyat tərzini təbliğ etmək, tütünçəkmə, o cümlədən digər zərərli vərdişlərin sağlamlığa təhlükəli təsirlərindən söz açmaq idi.
Mərkəzin İctimai sağlamlıq şöbəsinin əməkdaşı Nərmin Azadova təqdimatla məruzə edərək şagirdlərə sağlam həyat tərzinin üstünlüyü, tütünçəkmənin fəsadları barədə ətraflı məlumat verib.
İSİM-in Təlim-resurs şöbəsinin əməkdaşı Aysel Məmmədzadə təhlükəli statistikanı iştirakçıların nəzərinə çatdırıb: “Tütünçəkmənin təsiri nəticəsində hər il 8 milyon insan həyatını itirir, onların 1 milyonu passiv tütünçəkmənin qurbanlarıdır”.
Tədbirdə zərərli vərdişlərin həm sağlamlıq, həm də ətraf mühit üçün mənfi təsir göstərdiyi və zərərli vərdişlərdən uzaq olmağın vacibliyi bir daha vurğulanıb.
Sonda iştirakçıları maraqlandıran suallar cavablandırılıb və onlara maarifləndirici materiallar təqdim olunub.
Bölmənin digər xəbərləri
