ŞİRVAN MİLLİ PARKINDA BEYNƏLXALQ SEMİNAR

20.11.2003 [19:43]
Çap et
A⁺ A^-

Şirvan Milli parkının elmi-tədris mərkəzində “Azərbaycanda Milli parklar proqramının həyata keçirilməsinin birinci mərhələsi: problemlər və perspektivlər” mövzusunda beynəlxalq seminar keçirilmişdir. Ekologiya və Təbii Sərvətlər Nazirliyi tərəfindən təşkil olunmuş seminarda Almaniyanın M.Zukkov adına Təbiəti Mühafizə Fondunun sədri, alternativ Nobel mükafatı laureatı, professor Mixail Zukkovun başçılığı ilə fondun nümayəndə heyəti, Dünya vəhşi təbiət fondunun və digər beynəlxalq təşkilatların, xarici ölkələrin Azərbaycandakı diplomatik korpusunun nümayəndələri, alimlər iştirak etmişlər.

Ekologiya və təbii sərvətlər naziri Hüseynqulu Bağırov seminarın açılışında çıxış edərək, Milli parklar proqramının gerçəkləşdirilməsinin birinci mərhələsi barədə məlumat vermişdir. Bakının 102 kilometrliyində yerləşən Şirvan Milli parkının yaradılmasının ilk mərhələsində park haqqında Əsasnamə hazırlanmış, sorğu-monitorinq və müşahidə məntəqələri, avtobus dayanacağı tikilmiş, 6 kilometr uzunluğunda tor hasar çəkilmişdir. İkinci mərhələdə isə yollar təmir olunmuş və Neftçala rayonu ilə həmsərhəd ərazidə kanal çəkilməsi işləri davam etdirilmişdir. Nazir bərpa proseslərində, elmi tədqiqatların aparılmasında, ekoloji turizmin inkişafında milli parkların böyük rolunu vurğulamışdır. O, elmi monitorinq sahəsində kadrların fauna fərdlərinin hesablanması və ekoturizm sisteminin hazırlanması üçün M.Zukkov Fonduna təşəkkürünü bildirmişdir.

Seminarda heyvanat aləminin mühafizəsində, ekoloji təhsildə milli parkların rolu barədə məruzələr dinlənilmiş, fikir mübadiləsi aparılmışdır.