SON MƏNZİLƏ
Yanvarın 15-də respublikamızın ictimaiyyəti Azərbaycan milli musiqi sənətinin görkəmli nümayəndəsi, məşhur estrada müğənnisi, xalq artisti Mirzə ( Mirzəağa) Əbdülcabbar oğlu Babayevi son mənzilə yola salmışdır.
Mərhumun cənazəsi Rəşid Behbudov adına Dövlət Mahnı Teatrının səhnəsində postament üzərində qoyulmuşdu. Postamentin ətrafına Azərbaycan Respublikasının Prezidenti adından, habelə Mədəniyyət Nazirliyinin, yaradıcılıq təşkilatları, idarə və müəssisələr adından əklillər düzülmüşdü.
Salonda matəm musiqisi səslənirdi. Dövlət və hökumət nümayəndələri, mədəniyyət və incəsənət xadimləri, Milli Məclisin deputatları, fəxri qarovulda dayanaraq Mirzə Babayevə son borclarını verirdilər.
Matəm mərasimini Mədəniyyət naziri Polad Bülbüloğlu açdı. Milli Məclisin deputatları - Azərbaycan Yazıçılar Birliyinin sədri Anar və şair-dramaturq Vaqif Səmədoğlu, habelə xalq artisti, Bəstəkarlar İttifaqının 1-ci katibi Vasif Adıgözəlov, Memarlar İttifaqının vitse-prezidenti Hafiz Əmirxanov, xalq artisti, Kinematoqrafçılar İttifaqının 1-ci katibi Rasim Balayev, müğənnilərdən Yalçın Rzazadə, Oqtay Ağayev və başqaları çıxış etdilər.
Azərbaycan milli estradasının təşəkkül tapmasında və inkişafinda Mirzə Babayevin mühüm xidmətlərini qeyd edən natiqlər bu janrın ölkəmizdə geniş yayılmasında onun əvəzsiz rolunu vurğuladılar. Bildirildi ki, Azərbaycan bəstəkarlarının əsərlərini, xalq mahnılarını özünəməxsus tərzdə yüksək məharətlə ifa edən Mirzə Babayevin yaradıcılığı musiqi tariximizdə ayrıca bir mərhələdir. Öz dinləyicilərinə həmişə hörmətlə yanaşan, milli musiqimizi xarici ölkələrdə də layiqincə təmsil edən, ona şöhrət gətirən sənətkarın Azərbaycan kino sənətinin inkişafındakı xüsusi xidmətlərindən də söhbət açıldı. Natiqlər vurğuladılar ki, Mirzə Babayevin yaradıcılıq fəaliyyəti sənətə sonsuz sədaqət nümunəsi, əsl həyat məktəbi olmuşdur və sənətkarların gələcək nəsilləri bu zəngin mənbədən faydalanaraq musiqimizin inkişafına öz töhfələrini verəcəklər.
Qeyd olundu ki, Mirzə Babayev həm də memar və rəssam idi.
O, Nizami adına Azərbaycan Ədəbiyyatı Tarixi Muzeyinin tərtibatında yaxından iştirak etmişdir.
Mərhumun ailəsi adından çıxış edən Teymur Babayev əmisinin yaradıcılığına yüksək qiymət verdiyinə, onun xatirəsinə hörmət və ehtirama görə Azərbaycan Prezidentinə dərin minnətdarlığını bildirdi, vida mərasiminə toplaşanlara təşəkkür etdi. O dedi ki, vətənimizi, xalqımızı ürəkdən sevən görkəmli sənətkar müstəqil dövlətimizlə və onun Prezidenti Heydər Əliyev ilə həmişə fəxr edirdi.
X X X
Matəm mərasimi başa çatdıqdan sonra mərhumun cənazəsi Rəşid Behbudov adına Dövlət Mahnı Teatrının binasından Fəxri xiyabana gətirildi. Burada mərhumun ruhuna dua oxundu. Mirzə Əbdülcabbar oğlu Babayev torpağa tapşırıldı. Məzarın üstünə əklillər və gül dəstələri qoyuldu.
Böyük sənətkar, qayğıkeş və səmimi insan olan Mirzə Əbdülcabbar oğlu Babayevin əziz xatirəsi xalqımızın qəlbində həmişə yaşayacaqdır.
Allah rəhmət eləsin, qəbri nurla dolsun.
Bölmənin digər xəbərləri
