SİYASƏT
SOYQIRIMINA HƏSR OLUNMUŞ SƏRGİ
Martın 30-da Azərbaycan Dövlət İncəsənət Muzeyində 31 mart- azərbaycanlıların soyqırımı gününə həsr olunmuş sərgi açılmışdır. Sərgidə Azərbaycan rəssamları və heykəltəraşlarından Mikayıl Abdullayevin, Kamil Nəcəfzadənin, Əmirbəy Nərimanbəyovun, İlqar Əkbərovun, Böyükağa Mirzəzadənin və Sara Manafovanın əsərləri nümayiş etdirilir. Tanınmış sənətkarlarımızın bu əsərlərini həqiqətən tariximizə açılan pəncərə adlandırmaq olar. Bunlar təkcə Azərbaycan xalqının müstəqilliyə gedən keşməkeşli yolundan deyil, həm də dövlət müstəqilliyi uğrunda canlarından keçmiş mərd oğul və qızlarından söhbət açırlar.
Muzeyin direktoru İbrahim Zeynalov və mədəniyyət naziri Polad Bülbüloğlu sərginin açılışında çıxış edərək dedilər ki, erməni millətçilərinin azərbaycanlılara qarşı soyqırımı siyasətinə münasibət ilk dəfə Azərbaycan Xalq Cumhuriyyəti qurulduqdan sonra bildirilmişdir. Lakin bu sahədə ardıcıl və məqsədyönlü tədbirlər ölkəmiz ikinci dəfə müstəqillik qazandıqdan sonra, Azərbaycan Respublikasının Prezidenti Heydər Əliyevin bilavasitə təşəbbüsü ilə həyata keçirilmişdir.
Natiqlər vurğuladılar ki, ölkəmizin Prezidenti 1998-ci il martın 26-da “Azərbaycanlıların soyqırımı haqqında” Fərman və 1999-cu il martın 30-da isə həmin Fərmanın icrasının ardıcıl və mütəşəkkil şəkildə həyata keçirilməsi ilə bağlı tədbirlər planı haqqında Sərəncam imzalamışdır.
Elə həmin gün “Nizami” kinoteatrında Azərbaycan kinematoqrafçılarının cəkdikləri və azərbaycanlıların soyqırımına həsr olunmuş “Şəhidlik zirvəsi” sənədli filmi nümayiş etdirildi.