STRASBURQDA BMT, ATƏT VƏ AVROPA ŞURASININ YÜKSƏK VƏZİFƏLİ RƏSMİLƏRİNİN GÖRÜŞÜ KEÇİRİLMİŞDİR
AZƏRTAC-ın xüsusi müxbiri xəbər verir ki, Strasburqda Birləşmiş Millətlər Təşkilatı, Avropa Təhlükəsizlik və Əməkdaşlıq Təşkilatı və Avropa Şurasının yüksək vəzifəli rəsmilərinin üçtərəfli görüşü keçirilmişdir.
Görüşdə mədəniyyətlərarası dialoqun inkişaf etdirilməsi, bu sahədə əməkdaşlıq və dialoq prosesində insan hüquqlarının rolu məsələləri müzakirə olunmuşdur.
BMT, ATƏT və AŞ rəsmiləri görüşdə çıxış edərək mədəniyyətlərarası dialoqun inkişaf etdirilməsinin, çoxşaxəli mədəniyyətin idarə olunmasının qurumların fəaliyyət istiqamətlərinin əsas prioritetləri olduğunu bildirmişlər.
Mədəniyyətlərarası bilik və yeniliklərin tədrisinin zəruriliyini qeyd edən tərəflər bütün ölkələri mədəniyyətlərarası dialoqun inkişafı üçün hərtərəfli şərait yaradılması sahəsində əməli tədbirlər görməyə çağırmışlar. Qeyd edilmişdir ki, mədəniyyətlərarası dialoq münaqişələrin sülh yolu ilə həllinə kömək edə bilər.
Görüşün əhəmiyyətindən bəhs edən Avropa Şurasının baş katibi Terri Devis mədəniyyətlərarası dialoqun diqqət, yaradıcılıq və açıq fikirlilik tələb etdiyini vurğulamışdır.
Növbəti toplantının 2009-cu ildə keçirilməsi qərara alınmışdır.
Bölmənin digər xəbərləri
