Sudanda sel və daşqınlarda ölənlərin sayı 62 nəfərə çatıb
Bakı, 26 avqust, AZƏRTAC
Sudan hökumətinin məlumatında bildirilir ki, bu ölkədə leysan yağışlarından sonra baş vermiş sel və daşqınlar nəticəsində ölənlərin sayı 62 nəfərə çatıb.
AZƏRTAC Reuters agentliyinə istinadla xəbər verir ki, Sudanın Federal Səhiyyə Nazirliyinin məlumatına görə, təbii fəlakət nəticəsində 98 nəfər yaralanıb, minlərlə insan öz ev-eşiklərindən didərgin düşüb, yüzlərlə kəndi su basıb. Həmçinin, ölkənin 18 ştatından 17-sində 35 min ev dağılıb.
SUNA agentliyinin xəbərində bildirilir ki, leysan yağışları nəticəsində Nil çayının məcrasından çıxması ətraf rayonların suyun altında qalmasına səbəb olub. Regionda ərzaq və içməli su qıtlığı yaranıb. Səhiyyə Nazirliyi yoluxucu xəstəliklərin qarşısını almaq üçün təxirəsalınmaz tədbirlər görür. Xartum şəhərində yollar və körpülər də sıradan çıxıb, nəqliyyatın hərəkəti iflic olub.
BMT Sudandakı təbii fəlakət qurbanlarına yardım üçün tədbirlər həyata keçirir. Təşkilatın nümayəndəsi Cens Lerke bildirib ki, bu tədbirlər çərçivəsində əhalinin içməli su ilə təchiz edilməsinə xüsusi diqqət yetirilir.
Bölmənin digər xəbərləri
