“SÜLEYMAN VƏZİROV” BORUDÜZƏN GƏMİSİ FASİLƏSİZ İŞLƏYİR
AZƏRTAC xəbər verir ki, Bahar-Hövsan-Suraxanı qaz kəmərinin sualtı hissəsinin inşası sürətlə davam edir.
Azərbaycan Respublikası Dövlət Neft Şirkətindən (ARDNŞ) bildirmişlər ki, inşaat işlərinin ilk həftəsi ərzində “Süleyman Vəzirov” borudüzən gəmisinin göyərtəsindən ümumi uzunluğu 2810 metr olan 235 boru qaynaq edilərək dənizin dibinə salınmışdır. Dənizdə təzyiq altında işləyəcək avadanlığın işinin yoxlanması və sazlanması uğurla başa çatdırılmışdır. Hazırda 5 qaynaq postunun bütün kran və bucurqadları normal işləyir.
Xəzər Dəniz Neft Donanmasının “Oqtay Vəliyev” və “İrgiz” yedək gəmiləri boruları sahildən iş yerinə çatdırır. “Süleyman Vəzirov” borudüzən gəmisinin lövbərlərinin daşınması və yerləşdirilməsini “Nerça” gəmisi həyata keçirir. Qaz kəmərinin sualtı hissəsinin çəkilişi 2 ay ərzində həyata keçirilməlidir. Borudüzən gəmidə çalışan “Neftqaztikinti” Trestinin 3 nömrəli tikinti-quraşdırma idarəsinin inşaatçıları böyük həcmdə işlərin vaxtında başa çatdırılması üçün bütün qüvvələrini səfərbər etmişlər.
Trest, eyni zamanda mürəkkəb sahil obyektlərinin inşasına başlamışdır.
Bölmənin digər xəbərləri
