SUMQAYIT MÜƏLLİMLƏRİNİN ƏNƏNƏVİ AVQUST KONFRANSI
Şəhər təhsil şöbəsinin müdiri Vidadi Bağırov məruzəsində bildirmişdir ki, ilin yekunlarına görə şöbə dördüncü dəfədir ki, Təhsil Nazirliyinin diplomuna layiq görülmüşdür. Təhsilin keyfiyyətinə xüsusi diqqət yetirilməklə yanaşı, şagirdlərin estetik tərbiyəsi, yaradıcılıq qabiliyyətinin inkişafı üçün maksimum şərait yaradılmışdır. 30-dan artıq şagird müxtəlif müsabiqələrin qalibi və diplomantı olmuşdur. Amerikanın “Harmoniya layihəsi” təşkilatı şəhərin üç məktəbinə təmənnasız olaraq kompüter mərkəzləri vermişdir. Şəhərin 20 məktəbinin dam örtüyü tamamilə təzələnmiş, 70 min kvadratmetr şifer döşənmişdir.
Hami təşkilatların, habelə sponsorların işi xüsusi qeyd edildi. Məhz onların yardımı sayəsində şəhərin 48 orta məktəbinin hamısı təmir olunmuşdur və yeni dərs ilinə hazırdır. Şəhər bələdiyyəsinin xalq təhsil şöbəsi ilə sıx əlaqələri tədris prosesinə müsbət təsir göstərir, Sumqayıt məktəblilərinin uğur qazanmasına şərait yaradır. Ən yaxşı 20 məktəbli bələdiyyənin təqaüdçüsüdür.
Təhsil nazirinin müavini Elmar Qasımov konfransda çıxış edərək dedi ki, yeni tədris ilindən 1-5-ci sinif şagirdlərinin hamısına pulsuz dərsliklər veriləcəkdir. Bütün siniflərdə oxuyan məcburi köçkünlərin uşaqları da dərsliklərlə pulsuz təmin ediləcəklər.
Konfransda builki test imtahanlarında 600-dən artıq bal toplamış abituriyentlərə, eləcə də məktəblilərin dünya olimpiadasında gümüş medala layiq görülmüş iki şagirdə qiymətli hədiyyələr təqdim edildi.
Konfrans iştirakçıları respublika müəllimlərinin XII qurultayına nümayəndələr seçdilər.
Axırda Azərbaycan Respublikasının Prezidenti Heydər Əliyevə müraciət qəbul olundu.
Bölmənin digər xəbərləri
