Sumqayıtda bir neçə avtomobil oğurluğunda şübhəli bilinən şəxs saxlanılıb
Sumqayıt, 15 fevral, AZƏRTAC
Sumqayıt Şəhər Polis İdarəsi əməkdaşlarının keçirdikləri əməliyyat-axtarış tədbirləri nəticəsində 2017-ci il yanvarın 19-da “Köhnə Kotec” yaşayış massivində şəhər sakini Z.Əliyevə məxsus “VAZ-2106” markalı avtomobili qaçırmaqda şübhəli bilinən Sumqayıt şəhər sakini, əvvəllər oğurluğa görə məhkum olunmuş M.Zəkiyev avtomobillə birgə saxlanılıb.
Polis idarəsindən AZƏRTAC-a bildirilib ki, polis əməkdaşları tərəfindən onun digər cinayət əməlinin də üstü açılıb. Belə ki, M.Zəkiyevin ətrafında aparılmış əməliyyat tədbirləri nəticəsində məlum olub ki, o, 2015-ci ilin avqust ayında “VAZ-2106” markalı başqa bir avtomobili də qaçırdıb. Sonra avtomobili hissələrə bölərək satması, habelə 2018-ci ilin iyul ayında digər “VAZ-2107” markalı avtomobili qaçırması və Göyçay rayon sakininə satması müəyyən edilib.
Faktlarla bağlı araşdırma aparılır.
Bölmənin digər xəbərləri
