SUMQAYITDA EKOLOGİYA MƏSƏLƏLƏRİNƏ DAİR BEYNƏLXALQ SEMİNAR KEÇİRİLMİŞDİR
Sumqayıtda ekologiya məsələlərinə dair beynəlxalq seminar işini başa çatdırmışdır. Üç gün davam edən tədbirdə Almaniyadan, o cümlədən tərəfdaş şəhər Lüdviqshafendən gələn ekoloq mütəxəssislər yerli həmkarları ilə birlikdə ekoloji tərbiyə, məişət və sənaye tullantılarının kadastrı, su təchizatı və kanalizasiya təsərrüfatı problemləri barədə ətraflı fikir mübadiləsi aparmışlar. Şəhər İcra Hakimiyyətinin başçısı Vaqif Əliyev seminarın iştirakçılarını qəbul edərək, Almaniya Texniki Əməkdaşlıq Cəmiyyətinin təşəbbüsü ilə bu seminarın Sumqayıtda təşkil olunduğundan məmnun qaldığını bildirdi. Qonaqlar məlumat verdilər ki, sumqayıtlı həmkarları ilə birlikdə onlar 2004-cü ilin martınadək qarşılıqlı fəaliyyətə dair konkret plan və vəzifələri müəyyənləşdirmişlər. Qərara alındığı kimi, artıq sentyabrda Lüdviqshafendən Sumqayıta kommunikasiya sistemləri üzrə mütəxəssislər gələcək və onlar su təchizatı sistemi və kanalizasiya şəbəkəsindəki texniki qurğuların monitorinqini keçirəcək, bu qurğuların yenidən qurulmasının texniki əsaslarını hazırlayacaqlar. Həmçinin sentyabrda Almaniyada keçiriləcək seminarda bərk məişət tullantılarının yığılması və işlədilməsi ilə məşğul olan “ADEC” müştərək Azərbaycan-Almaniya müəssisəsinin nümayəndələri də iştirak edəcəklər. Söhbət zamanı qonaqlar sumqayıtlıların qonaqpərvərliyindən məmnunluq duyduqlarını bildirdilər, seminarın yaxşı təşkil olunmasından razılıq etdilər.
Bölmənin digər xəbərləri
