AZƏRTAC xəbər verir ki, Sumqayıtın tibb işçiləri öz peşə bayramını yaxşı göstəricilərlə qarşılamışlar. Şəhərin 30 tibb müəssisəsində təxminən 5 min işçi çalışır. Onların arasında respublikanın əməkdar həkimləri, elmlər namizədləri, yüksək attestasiya almış həkimlər, ixtisaslı tibb heyəti var Sumqayıt səhiyyə şöbəsinin konfrans salonunda keçirilən təntənəli yığıncaqda çıxış edənlər şəhərdə bu sahənin təşkilində sevindirici dəyişikliklərdən danışmışlar. Son vaxtlar səhiyyənin maddi-texniki bazasının xeyli möhkəmləndiyi xüsusi vurğulanmışdır. Şəhərdə vərəmə tutulma hallarının aşkara çıxarılması sahəsində genişmiqyaslı işlər aparılmış, bəzi yoluxucu xəstəliklərin qarşısı alınmışdır. Bütün bunlar, şübhəsiz, şəhər əhalisinin daha keyfiyyətli və ixtisaslaşdırılmış tibb xidməti ilə təmin olunması üçün yaxşı zəmin yaradır.
Şəhər icra hakimiyyətinin təşəbbüsü ilə son vaxtlar təmənnasız tibbi xidmət günləri təşkil olunur ki, bu da sakinlər tərəfindən böyük razılıqla qarşılanmışdır. Səyyar ambulatoriyalar əhalinin sıx yaşadığı və mərkəzdən uzaq ərazilərdə 20 mindən çox sakinə xidmət etməyə imkan vermişdir.
Fərqlənən tibb işçilərinə fəxri fərmanlar, qiymətli hədiyyələr və pul mükafatları təqdim olunmuşdur.
