MƏDƏNİYYƏT
Tanınmış qarmon ifaçısı Zakir Mirzəyevin yubileyi qeyd edilmişdir
Bakı, 30 oktyabr (AZƏRTAC). Oktyabrın 30-da Rəşid Behbudov adına Azərbaycan Dövlət Mahnı Teatrında tanınmış qarmon ustası, Əməkdar Artist, sənətşünaslıq üzrə fəlsəfə doktoru Zakir Mirzəyevin anadan olmasının 70 illiyinə həsr edilmiş gecə keçirilmişdir.
AZƏRTAC xəbər verir ki, tədbirdə çıxış edən Azərbaycan Milli Konservatoriyasının rektoru, Xalq Artisti, Siyavuş Kərimi Zakir Mirzəyevi məharətli qarmon ifaçısı, Azərbaycan muğamlarının bilicisi, öz sənətini yeni nəslə yorulmadan təbliğ edən fədakar pedaqoq və nəhayət cəfakeş alim kimi səciyyələndirmişdir. S.Kərimi yubilyara xoş arzularını bildirmiş, rəhbərlik etdiyi təhsil ocağının fəxri fərmanını ona təqdim etmişdir.
Bakı Dövlət Universitetinin ilahiyyat fakültəsinin dekanı, akademik Vasim Məmmədiliyev Zakir Mirzəyevi qarmon ifaçılığında yüksək sənətkarlıq məktəbi yaratmış Kəlbəlayi Lətif, Əhəd, Abutalıb, Teyyub Dəmirov kimi azman sənətkarlardan sonra bu sənətdə öz dəsti-xətti olan ifaçı kimi qiymətləndirmişdir. Onun istər solo ifaçılığında, istər müşayiətçi kimi tərəf müqabil olarkən göstərdiyi yüksək peşəkarlıqdan söhbət açmışdır.
Xalq artistləri Əlibaba Məmmədov, Arif Babayev və başqaları Zakir Mirzəyevin xalq arasında hörmət qazanmış musiqiçi və insan kimi yüksək keyfiyyətlərindən danışmışlar.
Gecədə incəsənət ustalarının ifasında xalq mahnıları, muğam və təsniflər ifa olunmuşdur.
Sonda Z.Mirzəyev tədbirin təşkilatçılarına və iştirakçılarına minnətdarlığını bildirmişdir.