TANINMIŞ REJİSSORUN YUBİLEYİ QEYD OLUNMUŞDUR
Tədbirdə Firudin Səfərovun keçdiyi yaradıcılıq yolundan danışılmış, onun klassik Azərbaycan opera sənətinin dünya şöhrətli ölməz incilərindən olan “Koroğlu” və “Leyli və Məcnun”a uğurlu səhnə həyatı verməsindən söhbət açılmışdır. Qeyd olunmuşdur ki, yubilyarın taleyin hökmü ilə Vətəndən kənarda yaşaması onu öz sənətindən ayıra bilməmişdir. Hazırda o, Daşkənd Opera və Balet Teatrının baş rejissoru vəzifəsində çalışır. Buna baxmayaraq, rejissor respublikamızın Mədəniyyət Nazirliyi ilə sıx əlaqələr saxlayır və bir müddət əvvəl nazirliyin dəvəti ilə Vasif Adıgözəlovun “Natəvan” operasını səhnələşdirmək üçün Bakıya gəlmişdir. Bir neçə ay ərzində gərgin əmək sayəsində ərsəyə gəlmiş “Natəvan” operasının ilk tamaşasının dekabrın 7-də Opera və Balet Teatrında göstəriləcəyini diqqətə çatdırmışdır.
Polad Bülbüloğlu 70 illik yubileyi münasibətilə Firudin Səfərova Mədəniyyət Nazirliyinin təsis etdiyi “Şərəf” döş nişanını və Fəxri Fərmanı təqdim etmişdir.
Ona göstərilən bu münasibətə və eyni zamanda Bakıya dəvət olunduğuna görə, Firudin Səfərov mədəniyyət nazirinə təşəkkürünü bildirmişdir.
Bölmənin digər xəbərləri
