Tarixin Heydər Əliyev zirvəsi: İmişlidə silsilə tədbirlər
İmişli, 10 may, Aydın Yavərzadə, AZƏRTAC
Ümummilli Lider Heydər Əliyevin anadan olmasının 102-ci ildönümü ilə əlaqədar İmişli rayonunda silsilə tədbirlər təşkil edilib. Tədbirlərdə rayon icra hakimiyyətinin başçısı Elçin Rzayev, Milli Məclisin deputatı Səyyad Salahlı, YAP İmişli rayon təşkilatının sədri Səfa Ağayev, hüquq-mühafizə orqanlarının rəhbərləri, idarə və müəssisə kollektivləri, şəhid ailələri, qazilər, ictimaiyyət nümayəndələri və rayon sakinləri iştirak ediblər.
İmişli Rayon İcra Hakimiyyətindən AZƏRTAC-ın bölgə müxbirinə verilən məlumata görə, Ulu Öndərin abidəsi ziyarət olunub, önünə tər güllər düzülüb, Ümummilli Liderin əziz xatirəsi dərin ehtiramla yad edilib.
Silsilə tədbirlərin tərkib hissəsi olaraq, Ulu Öndər Heydər Əliyevin anadan olmasının 102-ci ildönümünə həsr edilən “Tarixin Heydər Əliyev zirvəsi” adlı tədbir keçirilib. Əvvəlcə Dövlət Himni səsləndirilib, Ulu Öndər Heydər Əliyevin, eləcə də şəhidlərimizin əziz xatirələri bir dəqiqəlik sükutla yad edilib.
Daha sonra Ulu Öndərin şərəfli ömür yolu və fəaliyyətini əks etdirən sənədli film nümayiş olunub.
Çıxış edənlər Heydər Əliyevin Azərbaycan dövlətçiliyinin formalaşmasında və möhkəmlənməsindəki müstəsna rolundan, onun uzaqgörən və zəngin siyasi irsindən, müasir müstəqil Azərbaycanın qurucusu kimi tarixi xidmətlərindən ətraflı danışıblar.
Sonra YAP sıralarına yeni üzv olan gənclərə partiya vəsiqələri təqdim edilib. Silsilə tədbirlər zamanı, həmçinin Ulu Öndər Heydər Əliyevin anadan olmasının 102 illiyinə həsr edilən konsert proqramı təşkil edilib. Çıxış edənlər Ümummilli Lider Heydər Əliyevin zəngin həyat və fəaliyyətindən, dövlət quruculuğu istiqamətində atdığı mühüm addımlardan, ölkəmizin inkişafında və milli dəyərlərin qorunmasında əvəzsiz rolundan danışıblar. Bildirilib ki, onun dahi irsi bu gün Prezident İlham Əliyevin rəhbərliyi ilə uğurla davam etdirilir.
Daha sonra konsertdə tanınmış incəsənət ustaları tərəfindən Ümummilli Lider Heydər Əliyevə və müstəqil Azərbaycana həsr olunan vətənpərvər ruhlu musiqi nömrələri ifa olunub, bayram ovqatı bəxş edən bu bədii tədbir rayon sakinlərində yüksək ruh və vətənpərvərlik hissi yaradıb.
Bölmənin digər xəbərləri
