TBİLİSİDƏ BEYNƏLXALQ KONFRANS KEÇİRİLMİŞDİR
Gürcüstanın paytaxtı Tbilisi şəhərində “Cənubi Qafqazda su ehtiyatlarının istifadəsi, qorunması sahəsində hüquqi məsələlər və qanunvericiliyin təkmilləşdirilməsi istiqamətində beynəlxalq standartların tətbiqi təcrübəsi” mövzusunda beynəlxalq konfrans keçirilmişdir. Azərbaycan Respublikasının İnsan hüquqları üzrə Müvəkkili (Ombudsman) Aparatının elmi-analitik şöbəsinin baş məsləhətçisi Aydın Səfixanlı həmin konfransda “Azərbaycanda su hövzələrinin qorunması və istifadəsinin hüquqi məsələləri, bu sahədə ratifikasiya edilmiş beynəlxalq konvensiyalar və Ombudsmanın ekoloji hüquqların qorunmasında rolu” mövzusunda məruzə ilə çıxıs etmişdir. Məruzəçi çıxışında ölkəmizin içməli su mənbələrinin mühafizəsi sahəsində mühüm problemlərin olduğunu, xüsusilə Kürün Araz vasitəsilə Ermənistan ərazisində zəhərli tullantılarla çirkləndirilməsini, Gürcüstan ərazisində isə mühafizəsinin lazımi səviyyədə təşkil olunmamasını diqqətə çatdırmışdır. Sonra o Ermənistanın Azərbaycana təcavüzü nəticəsində torpaqlarımızın 20 faizinin işğal altında olmasından və bu ərazilərdə bir çox içməli su ehtiyatlarının həyat üçün təhlükəli maddələrlə çirkləndirilməsindən söhbət açmışdır. Natiq eyni zamanda təmsil etdiyi təsisatın bilavasitə insanların ekoloji hüquqlarının müdafiəsi ilə bağlı fəaliyyəti barədə ətraflı məlumat vermişdir.
Bölmənin digər xəbərləri
