TBİLİSİDƏ “QAFQAZIN DAĞ REGİONLARININ DAVAMLI İNKİŞAFI” MÖVZUSUNDA KONFRANS KEÇİRİLMİŞDİR
Qafqaz Regional Ekoloji Mərkəzi Gürcüstan Respublikasının paytaxtı Tbilisi şəhərində “Qafqazın dağ regionlarının davamlı inkişafı” mövzusunda ikigünlük beynəlxalq konfrans keçirmişdir. Dünyanın bir sıra ölkələrindən, o cümlədən Azərbaycan, Türkiyə, Rusiya, Almaniya və Hollandiyadan olan dövlət qurumları və qeyri-hökumət təşkilatları nümayəndələrinin, alim və mütəxəssislərin iştirak etdiyi konfrans əsasən ekoloji problemlərə, bu sahədə qanunvericilik və idarəçilik məsələlərinə həsr olunmuşdur. Burada 75-ə qədər müxtəlif mövzularda məruzələr dinlənilmişdir. Qafqaz Regional Ekoloji Mərkəzinin prezidenti, Azərbaycan Milli Elmlər Akademiyasının müxbir üzvü Ramiz Məmmədov giriş sözü ilə konfransı açmış və “Qafqazın dağ regionlarında yoxsulluq və ekoloji problemlər” mövzusunda məruzə ilə çıxış etmişdir. Tədbirdə dağ rayonlarının inkişafına dair yekun sənəd qəbul olunmuş və müvafiq təşkilatlara göndərilmişdir.
Bölmənin digər xəbərləri
