Teatrşünas-alim İnqilab Kərimovun 95 illik yubileyinə həsr edilən elmi sessiya
Bakı, 29 aprel, AZƏRTAC
AMEA-da Memarlıq və İncəsənət İnstitutunun təşkilatçılığı ilə görkəmli teatrşünas-alim, AMEA-nın müxbir üzvü, professor İnqilab Kərimovun 95 illik yubileyinə həsr edilən elmi sessiya keçirilib.
Bu barədə AZƏRTAC-a institutdan məlumat verilib.
Tədbirdə institutun direktoru, AMEA-nın müxbir üzvü, professor Ərtegin Salamzadə görkəmli teatrşünas-alimin çoxşaxəli yaradıcılığından, pedaqoji fəaliyyətindən, insani keyfiyyətlərindən danışaraq bu gün İnqilab Kərimovun 95 illiyinin qeyd edilməsinin onun Azərbaycan elmi qarşısında göstərdiyi xidmətlərinin nəticəsi kimi dəyərləndirib. Qeyd edib ki, İnqilab Kərimov 1957-ci ildən etibarən AMEA Memarlıq və İncəsənət İnstitutunda fəaliyyətə başlayıb. Həmçinin o, qırx ilə yaxın pedaqoji fəaliyyətlə məşğul olub. Onun elmi və təşkilati fəaliyyəti bu institutla sıx bağlı olub, xüsusilə teatrşünaslıq sahəsində dəyərli araşdırmalar aparıb. İnqilab Kərimov 1985-ci ildən ömrünün sonuna qədər institutun Teatr, kino və televiziya şöbəsinə rəhbərlik edib, bu sahələrin inkişafında mühüm rol oynayıb. Onun rəhbərliyi dövründə şöbədə aparılan tədqiqatlar Azərbaycan səhnə sənətinin nəzəri və praktik problemlərinin araşdırılmasına yönəldilib.
Alimin elmi fəaliyyətindən bəhs edən Ərtegin Salamzadə 200-dən çox elmi əsərin müəllifi olan İ.Kərimovun əsas tədqiqat istiqamətinin Azərbaycan teatr tarixi və inkişafı olduğunu söyləyib. O əlavə edib ki, alimin elmi-təşkilati fəaliyyəti dövründə rəhbərlik etdiyi elmi araşdırmaların nəticəsi olan “Azərbaycan teatr tarixi” kitabının I və II cildində bu istiqamət özünü ehtiva edir.
İnqilab Kərimovun elmi fəaliyyətini yüksək qiymətləndirən professor Ərtegin Salamzadə onun “Azərbaycan-Türkiyə teatr əlaqələri” kitabını xüsusi qeyd edib. Bildirib ki, teatrşünas-alim İ.Kərimov 1963-cü ildə namizədlik, 1988-ci ildə isə doktorluq dissertasiyasını müdafiə edib.
Ərtegin Salamzadə teatrşünas-alim İnqilab Kərimovun zəngin elmi və yaradıcılıq irsi olduğunu, onun Azərbaycan teatrşünaslıq elminin inkişafında əhəmiyyətli rolu olduğunu, eləcə də elmi, pedaqoji və yaradıcılıq fəaliyyəti ilə mədəniyyət tarixində silinməz iz qoyduğunu qeyd edib. İnqilab Kərimovun rəhbərliyi altında çox sayda fəlsəfə doktorlarının, yüksəkixtisaslı mədəniyyət kadrlarının hazırlandığını və teatrşünaslıq sahəsində apardığı araşdırmaları ilə teatr və mədəniyyətin inkişafına, incəsənət elminə böyük töhfələr verdiyini söyləyib. O, həmçinin alimin bədii yaradıcılığından bəhs edib, onun təşəbbüsü ilə səhnələşdirilən tamaşalardan və müəllifi olduğu əsərlərdən danışıb.
Memarlıq və İncəsənət İnstitutunun Teatr, kino və televiziya şöbəsinin hazırladığı teatrşünas-alim İnqilab Kərimovun həyat və yaradıcılığına həsr edilən fotoqalereya nümayiş etdirilib.
Tədbirdə sənətşünaslıq üzrə fəlsəfə doktorları - dosent Vidadi Qafarov “İnqilab Kərimovun elmi irsi Azərbaycan teatrşünaslığının inkişafı kontekstində”, dosent Nərminə Ağayeva “ İnqilab Kərimovun bədii yaradıcılığı”, Əməkdar incəsənət xadimi, sənətşünaslıq doktoru Məryəm Əlizadə “İnqilab Kərimov milli teatr tariximizin tədqiqatçı-pedaqoqu kimi” mövzusunda məruzə ediblər.
Sonda mərhumun qızı sənətşünaslıq üzrə fəlsəfə doktoru, dosent Gülnarə Kərimova çıxış edərək institutun rəhbərliyinə və iştirakçılara öz minnətdarlığını bildirib.
Bölmənin digər xəbərləri
