TƏBİİ FƏLAKƏT ELEKTRİK ENERJİSİ TƏCHİZATINI POZMUŞDUR

21.11.2003 [21:51]
Çap et
A⁺ A^-

AZƏRTAC-ın müxbiri xəbər verir ki, noyabrın 21-də saat 11.00-dan başlayan güclü külək İsmayıllı, Şamaxı, Ağsu və Kürdəmir rayonlarında ciddi çətinliklər yaratmışdır. Bölgədə elektrik təchizatı tamamilə pozulmuşdur. “BAYVA Cənub-Enerji” MMC-nin Ağsu Ərazi Elektrik Şəbəkəsinin direktoru Adil Rəfiyevin dediyinə görə bu rayonların hər birində 30-dan 50-dək elektrik dirəyi yıxılmış, ümumilikdə 80 kilometr məsafədə naqillər qırılmışdır. Ən çox zərər İsmayıllı rayonuna dəymişdir. İlkin hesablamalara görə, 4 rayon üzrə ümumi zərər 100 milyon manatdan çoxdur.

Dəymiş zərərin nəticələrinin aradan qaldırılması məqsədi ilə operativ tədbirlər görülür. Energetiklər fövqəladə iş rejiminə keçmişlər. 18 briqada yaradılmış, hər briqada maşın və mexanizmlərlə, kifayət qədər avadanlıqlarla, o cümlədən ehtiyat dirəklər, naqillərlə təchiz olunmuşdur. Saat 16.00-dan sonra külək səngisə də kəsməyib. Külək dayanarsa, dərhal bərpa işlərinə başlanacaqdır. Sakitlik yaranarsa, gecə də işləmək şərti ilə noyabrın 22-də günün ikinci yarısınadək rayonların elektrik enerjisi ilə təchizatı tam bərpa olunacaqdır.

TƏBİİ FƏLAKƏT ELEKTRİK ENERJİSİ TƏCHİZATINI POZMUŞDUR

MÜƏLLİFLƏ ƏLAQƏ

Bölmənin digər xəbərləri