TƏHSİL NAZİRİ ABŞ-IN “DÜNYAYA BAXIŞ” TƏŞKİLATININ NÜMAYƏNDƏSİ İLƏ GÖRÜŞMÜŞDÜR

22.04.2006 [11:29]
Çap et
A⁺ A^-

Təhsil Nazirliyindən AZƏRTAC-a bildirmişlər ki, nazir Misir Mərdanovun ABŞ-ın “Dünyaya baxış” təşkilatının nümayəndəsi xanım Lesli Harnişlə görüşündə xüsusi qayğıya ehtiyacı olan (sağlamlıq imkanları məhdud) uşaqların təhsilinin təşkili ilə əlaqədar İnkişaf Proqramı çərçivəsində həyata keçirilən layihələrlə bağlı aparılan işlər və mövcud problemlər müzakirə olunmuşdur.

Xanım Lesli Harniş bildirmişdir ki, ölkəmizdən üç nəfər seçilərək, inklüziv təhsil sahəsində beynəlxalq təcrübəni öyrənmək məqsədi ilə Amerika Birləşmiş Ştatlarına göndəriləcəkdir. O, inklüziv təhsil sahəsində xüsusi xidmətlərin təşkilinin, fərdi tədris planlarının hazırlanmasının və ilkin müəllim hazırlığında müvafiq təhsil komponentlərinin nəzərə alınmasının vacibliyini diqqətə çatdırmış, nazirlikdə xüsusi təhsil şöbəsinin yaradılmasını təklif etmişdir.

M.Mərdanov xüsusi təhsil şöbəsi yaradılması təklifinə münasibətini açıqlayaraq demişdir ki, hazırda dörd əməkdaş müvafiq qurumda inklüziv təhsil sahəsi ilə məşğul olur.

Nazir müvafiq struktur rəhbərlərinə müzakirə edilən məsələlərin reallaşdırılması ilə bağlı tapşırıqlar vermişdir.