TƏHSİL NAZİRLİYİNDƏ GÖRÜŞ OLMUŞDUR

17.12.2006 [03:11]
Çap et
A⁺ A^-

Təhsil Nazirliyindən AZƏRTAC-a bildirmişlər ki, nazir Misir Mərdanov Amerika Birləşmiş Ştatlarının ölkəmizdəki səfirliyinin ictimaiyyətlə əlaqə şöbəsinin rəhbəri Conatan Henk ilə görüşmüşdür.

Görüşdə M. Mərdanov Prezident İlham Əliyevin “Azərbaycan gənclərinin xarici ölkələrdə təhsil almasına dair Dövlət Proqramı haqqında” Sərəncamının əhəmiyyətindən, sənədə uyğun olaraq İqtisadi İnkişaf Nazirliyi ilə birgə yaradılan işçi qrupunun gördüyü işlərdən danışmışdır.

C. Henk dünyada mövcud olan ən yüksək təhsil proqramları çərçivəsində tələbələrin ABŞ-da təhsil alması barədə məlumat vermişdir. O, eyni zamanda, hazırda öz ölkəsinin universitetlərinə tələbə qəbulunun başlandığını da diqqətə çatdırmışdır.

Görüşdə iki ölkənin ali təhsil müəssisələri arasında əlaqələrin genişləndirilməsi, mübadilə proqramları və s. ilə bağlı müzakirələr aparılmışdır.