TƏLƏBƏ QƏBULU ÜZRƏ DÖVLƏT KOMİSSİYASINDA MƏTBUAT KONFRANSI KEÇİRİLMİŞDİR
Komissiyanın sədri Məleykə Abbaszadə çıxış edərək, təhsil sahəsində dövlətlərarası müqaviləyə əsasən, rəhbərlik etdiyi qurum ilə Türkiyə Respublikası Öyrənci Seçmə və Yerləşdirmə Mərkəzinin (ÖSYM) Türkiyə universitetlərində təhsil almaq istəyən Azərbaycan gəncləri üçün aprelin 22-də respublikamızda birgə qəbul imtahanları keçirdiklərini bildirmişdir.
Qeyd olunmuşdur ki, bu il Türkiyə Respublikasının 12 universitetində Azərbaycan gənclərinə 21 ixtisas üzrə təhsil almaq üçün 47 yer ayrılmışdır. Müsabiqə ÖSYM tərəfindən aparılacaqdır. Nəticələr TQDK-ya göndərildikdən sonra qəbul olunanların siyahısı açıqlanacaqdır.
TQDK-nın Rusiya Federasiyası (RF) ali məktəblərində Azərbaycan Respublikası vətəndaşları üçün ayrılmış yerlərə tələbə qəbulu apardığını da söyləyən M. Abbaszadə, həmin ali təhsil müəssisələrinə qəbul qaydaları və imtahanları barədə ətraflı məlumatlar vermişdir. Diqqətə çatdırmışdır ki, bu il Moskva Dövlət Beynəlxalq Münasibətlər İnstitutuna da tələbə qəbulu aparılacaq və bu ali təhsil müəssisəsinə qəbul imtahanı rus dilində keçiriləcəkdir.
TQDK-nın sədri jurnalistləri maraqlandıran sualları da cavablandırmışdır.
Bölmənin digər xəbərləri
