TƏRƏFLƏR BEYNƏLXALQ ƏMƏKDAŞLIQ BARƏDƏ RAZILIQ ƏLDƏ ETMİŞLƏR
AZƏRTAC xəbər verir ki, ölkəmizdə səfərdə olan Pakistan İslam Respublikası Senatının xarici əlaqələr komitəsinin sədri Müşahid Hüseyn Səidin başçılıq etdiyi nümayəndə heyəti iyulun 7-də Milli Məclisin beynəlxalq münasibətlər və parlamentlərarası əlaqələr daimi komissiyasının üzvləri ilə görüşmüşdür. Komissiyanın sədri Səməd Seyidov Azərbaycan parlamentinin beynəlxalq əlaqələri, rəhbərlik etdiyi qurumun bu sahədəki fəaliyyəti barədə ətraflı məlumat vermişdir. O demişdir ki, deputatlarımız İslam Konfransı Təşkilatı, Parlamentlərarası İttifaq və digər beynəlxalq təşkilatlarda çox faydalı əməkdaşlıq edirlər. S.Seyidov bu cür əməkdaşlığın hər iki tərəfin maraqlarına xidmət etdiyini vurğulamışdır.
Müşahid Hüseyn Səid demişdir ki, səfərdən məqsəd Azərbaycan-Pakistan parlamentləri arasında əlaqələrin inkişafına dair danışıqlar aparmaqdır. Senator rəhbərlik etdiyi komissiyanın fəaliyyəti barədə ətraflı məlumat vermişdir.
Sonra görüşdə qarşılıqlı maraq doğuran digər məsələlər ətrafında geniş fikir mübadiləsi aparılmışdır.
Tərəflər beynəlxalq təşkilatlarda birgə əməkdaşlığın daha da gücləndirilməsinin əhəmiyyətindən danışmış, qarşılıqlı səfərlərin daha da intensivləşdirilməsinin vacibliyini vurğulamışlar.
######
Bölmənin digər xəbərləri
