Tərlan Qorçu: Xarici tamaşaçıların reaksiyası gözlədiyimizdən də yüksək oldu
Şarlövil-Mezyer, 24 sentyabr, AZƏRTAC
Birinci tamaşanın xoş təsiri altındayıq, tamaşaçıların reaksiya və emosiyalarının belə güclü olmasını gözləmirdik. Çünki səhnədə böyük dəyişikliklər var idi Bakı səhnəsi ilə müqayisə etmək olmaz, adət etdiyimiz səhnəni burada yaratmaq çətindir. Qısa müddət ərzində bu yeni səhnəyə uyğunlaşmalı, adaptasiya etməli idik.
Bu fikirləri AZƏRTAC-a müsahibəsində Fransada 20-ci Şarlövil-Mezyer Beynəlxalq Marionet Teatrları Festivalında Bakı Marionet Teatrının təsisçisi və rejissoru Tərlan Qorçu söyləyib.
“Ancaq nəticə göstərdi ki, tamaşa yüksək səviyyədə hazırlananda, hisslərimizi incə və məharətlə ifadə edəndə bütün dil baryerası yoxa çıxır. Birinci tamaşada aktyorlarda narahat idilər, ancaq sonrakı tamaşalarda artıq öyrəşdilər. “Leyli və Məcnun” tamaşası ölkədə 2 ildir göstərilir və yerli tamaşaçılarımızın reaksiyasın tanıyırıq, ancaq burada ilk reaksiya bizim üçün vacib idi və o gözlədiyimizdən də yüksək oldu. Buna çox sevindik.
Azərbaycan klassikasına olan məhəbbəti gördük və işimizi hansı istiqamətdə davam etdirəcəyimizi bildik”,-deyə T. Qorçu diqqətə çatdırıb.
Qeyd edib ki, tamaşaçılar təqdimatı 4 seansdan çox tələb ediblər. Tamaşanın biletləri satışa çıxarılandan 15 gün sonra artıq bütün tamaşalara biletlər satılıb qurtarıb. Bu tamaşaya olan marağı əks etdirir.
“Bəzi tamaşaçılar yaxınlaşıb əlavə seans verilməsin xahiş edirdilər”-deyə T. Qorçu vurğulayıb.
Şəhla Ağalarova
AZƏRTAC-ın xüsusi müxbiri
Şarlövil-Mezyer
Bölmənin digər xəbərləri
