Təsviri sənət dünyamızın ən görkəmli nümayəndələrindən bəhs edən kitab
Bakı, 13 dekabr (AZƏRTAC). “Təhsil” nəşriyyatında yüksək poliqrafik dizaynla çapdan çıxmış “XX əsr Azərbaycan incəsənəti haqqında oçerklər” kitabında təsviri sənət dünyamızın ən görkəmli nümayəndələri - Bəhruz Kəngərli, Səttar Bəhlulzadə, Mikayıl Abdullayev, Tahir Salahov, Toğrul Nərimanbəyov və digər məşhur rəssam və heykəltəraşlarımız haqqında dolğun və ətraflı məlumatlar toplanmışdır.
AZƏRTAC xəbər verir ki, Azərbaycan Milli Elmlər Akademiyasının dissertantı, Azərbaycan Rəssamlar İttifaqının üzvü, sənətşünas Əsəd Quliyevin müəllifi olduğu bu topluda hər bir rəssamın həyat və yaradıcılığı, əsərlərinin səciyyəvi xüsusiyyətləri və təhlili barədə müfəssəl məlumatlar əks olunmuşdur.
Kitab Mədəniyyət və Turizm Nazirliyinin dəstəyi ilə nəşr edilmişdir.
Sənətşünaslıq doktoru, professor Kübra Əliyevanın elmi redaktorluğu ilə işıq üzü görən topluya xalq rəssamları Ömər Eldarov, Salxab Məmmədov, Əməkdar İncəsənət Xadimi, dosent Ziyadxan Əliyev və sənətşünaslıq doktoru, professor Sevil Sadıxova rəy vermişlər.
Xalq Rəssamı, akademik, Azərbaycan Dövlət Rəssamlıq Akademiyasının rektoru Ömər Eldarov kitaba yazdığı “Ön söz”də Ə.Quliyevin araşdırmalarını incəsənət tariximizin təbliğinə yaddaqalan bir töhfə kimi qiymətləndirmişdir.
Geniş informasiyalarla zəngin olan 168 səhifəlik bu kitab qalereya və muzey işçiləri, rəssamlar, sənətşünaslar, tələbələr, eləcə də Azərbaycan incəsənəti ilə maraqlananlar üçün maraqlı olacaqdır.
Dekabrın 17-də Azərbaycan Dövlət Rəssamlıq Akademiyasında kitabın təqdimatı keçiriləcəkdir.
Bölmənin digər xəbərləri
