CƏMİYYƏT
Tovuz rayonunun səhiyyə işçiləri peşə bayramlarını qeyd etmişlər
Tovuz, 17 iyun (AZƏRTAC). Tovuzda səhiyyə işçilərinin peşə bayramı münasibətilə tədbir keçirilmişdir.
AZƏRTAC xəbər verir ki, səhiyyə işçiləri və rayon ictimaiyyətinin nümayəndələri əvvəlcə xalqımızın ümummilli lideri Heydər Əliyevin Tovuz şəhərindəki abidəsi önünə gül-çiçək düzmüş, xatirəsini ehtiramla yad etmişlər.
Tədbirdə çıxış edən rayon mərkəzi xəstəxanasının baş həkimi Paşa Muradov tibb işçilərini peşə bayramı münasibətilə təbrik etmiş, ölkədə səhiyyənin inkişafına göstərilən dövlət qayğısından, səhiyyə müəssisələrinin maddi-texniki bazasının möhkəmləndirilməsi, müasir avadanlıqla təchizatı istiqamətində görülən işlərdən danışmışdır. Qeyd olunmuşdur ki, son illər Tovuzda istifadəyə verilən 80 çarpayılıq xəstəxana, Müalicə-Diaqnostika Mərkəzi tibb işçilərinə göstərilən qayğının bariz nümunəsidir.
Sonra tibb işçiləri Tovuz şəhərindəki Heydər Əliyev Mərkəzini ziyarət etmiş, Ulu Öndərin həyat və fəaliyyətini əks etdirən fotoşəkillərlə tanış olmuş və Ümummilli Liderə həsr olunmuş filmə baxmışlar.