Türk dövlətlərinin birliyi həm də qardaşlığın təzahürüdür ŞƏRH
Quba, 9 oktyabr, AZƏRTAC
“Bölgələrdən AZƏRTAC üçün yazırlar”: ADPU-nun Quba filialının direktor müavini Aysel Şeydayevanın oktyabrın 7-də Qəbələdə keçirilən Türk Dövlətləri Təşkilatının (TDT) Dövlət Başçıları Şurasının 12-ci Zirvə Görüşü ilə bağlı məqaləsini təqdim edirik.
Bu günlərdə Azərbaycan növbəti bir mötəbər tədbirə ev sahibliyi etdi. Azərbaycanın qədim yurd yeri olan Qəbələdən, Türk Dövlətləri Təşkilatının Dövlət Başçıları Şurasının 12-ci Zirvə Görüşündən Türk dünyasına, həmçinin bütün dünyaya önəmli mesajlar verildi. Bu tədbiri fərqləndirən əsas məqamlardan biri Türk dövlətləri arasında qardaşlıq, birlik və əməkdaşlıq ruhunu ifadə etməsi idi. Bu Zirvə Görüşü dil, mədəniyyət, tarix və ortaq dəyərlər əsasında birləşən Türk ölkələrinin həm mənəvi, həm də siyasi-institusional birliyini ifadə edən simvolik və real bir anlayışın nümunəvi və müasir görüntüsünü sərgiləyirdi, həm bir kökdən gələn xalqların birliyini, həm də onların gələcəyə birgə baxışını təmsil edirdi.
Zirvə Görüşünün hər anını qürurla izlədik. Tarixi anları yaddaşımıza yazdıq. Prezident İlham Əliyevin ötən ilin fevralın andiçmə mərasimində səsləndirdiyi “Bizim ailəmiz Türk dünyasıdır” fikrinin sadə bəyanat olmadığı bir daha təsdiqləndi. Dövlətimizin başçısının təşəbbüsləri nəticəsində TDT formal birlikdən çıxaraq, dünya siyasətində mühüm aktora çevrilir. Azərbaycanın ev sahibliyi etdiyi Zirvə Görüşü təkcə diplomatik hadisə, mədəni platforma deyil, liderliyin və etimadın rəsmi təsdiqi oldu.
Bəli, həqiqətən də Türk Dövlətləri Təşkilatı dünənin, bu günün və gələcəyin təşkilatıdır, birliyə əsaslanan güc, ədalətə əsaslanan siyasət və mədəniyyətə əsaslanan kimlik modelidir. Bunu yaşatmaq bizlərin mənəvi borcudur. Zirvə Görüşündə yadda qalan məqamlardan biri də Prezident İlham Əliyevin 1926-cı ildə Bakıda keçirilmiş Birinci Türkoloji Qurultayın 100 illiyinin 2026-cı ildə TDT çərçivəsində təntənəli şəkildə qeyd edilməsi təklifi oldu. Bu, öz tariximizə, soykökümüzə, Türk dövlətlərinin birliyinə verilən dəyərin bariz nümunəsi idi.
Türk dövlətlərinin birliyi sadəcə əməkdaşlıq platforması, diplomatik birləşmə deyil, həm də qardaşlığın təzahürüdür. Bu isə yalnız sözdə deyil, əməldə də təzahür edir. Prezident İlham Əliyevin Zirvə Görüşündəki çıxışında dediyi sözlər həm də mənəvi gücü və birliyi ifadə edirdi: “Qarabağın və Şərqi Zəngəzurun bərpasına dəstək üçün qardaş ölkələrə bir daha təşəkkürümü bildirirəm. Füzulidə Mirzə Uluqbəy adına məktəb, Kurmanqazı adına Uşaq Yaradıcılıq Mərkəzi, Ağdamda Manas adına məktəb artıq fəaliyyətdədir. Bu, özbək, qazax, qırğız qardaşlarımızın hədiyyəsidir. Macar qardaşlarımızın hədiyyəsi Cəbrayılda tikilən məktəbdir. Türkmən qardaşlarımızın hədiyyəsi – bu gün təməli qoyulan Füzuli məscididir. Qardaş Türkiyənin şirkətləri bir çox tunellər, körpülər, yollar inşa edir. Azərbaycan xalqı bu qardaş dəstəyini heç vaxt unutmayacaq”. İşğaldan azad olunan rayonlarımızın yenidən qurulmasında verilən qardaş dəstəyi təbii ki, həm də bu birliyin təzahürüdür.
Zirvə çərçivəsində qəbul olunan qərarlar, imzalanan sənədlər və səslənən mesajlar Türk dövlətlərinin siyasi iradəsinin, qarşılıqlı hörmətə və əməkdaşlığa əsaslanan münasibətlərinin bariz göstəricisidir. Enerji təhlükəsizliyi, nəqliyyat dəhlizləri, rəqəmsal inteqrasiya, gənclər və təhsil sahəsində əməkdaşlıq bu gün TDT-nin gündəliyində əsas prioritetlərdəndir. Bu həmrəylik sayəsində Türk dövlətləri dünyada özünün yeni inkişaf dövrünə qədəm qoyur.
Bölmənin digər xəbərləri
