TÜRKİYƏ GÜRCÜSTANDAKI AZƏRBAYCANLILARIN DAİM QAYĞISINA QALACAQ
Türkiyənin Tbilisidəki fövqəladə və səlahiyyətli səfiri xanım Fatma Dəclə Kopuz Gürcüstanda yaşayan azərbaycanlılarla növbəti görüşü M.F.Axundov adına Azərbaycan mədəniyyəti mərkəzində keçirmişdir.
Səfir regionda Türkiyənin çox önəm verdiyi dövlətlərdən birinin də Gürcüstan olduğunu vurğulayaraq demişdir ki, onun ölkəsi Gürcüstanın dövlət müstəqilliyinin möhkəmlənməsində, ərazi bütövlüyünün təmin edilməsində, buradakı, eləcə də regiondakı münaqişələrin dincliklə nizama salınmasında maraqlıdır. Çünki Türkiyə Gürcüstanda bütün xalqların, o cümlədən də azərbaycanlıların firavan və təhlükəsiz yaşamasını istəyir. Qardaş Azərbaycan kimi, Türkiyə də Gürcüstanda yaşayan azərbaycanlılara həmişə qayğı göstərmişdir və bu məsələni gələcəkdə də diqqətdə saxlayacaqdır.
Görüşdə ölkəmizin Tbilisidəki səfiri Hacan Hacıyev, Gürcüstan Prezidentinin İcra Aparatının regional siyasət şöbəsi müdirinin müavini İmir Məmmədli, “Gürcüstan” qəzetinin baş redaktoru Süleyman Süleymanov və başqaları çıxış edərək, Türkiyə-Azərbaycan-Gürcüstan dostluğundan danışdılar və Gürcüstanda yaşayan azərbaycanlılara qayğısına görə Türkiyə hökumətinə və xalqına minnətdarlıqlarını bildirdilər.
Şahismayıl Məmmədov
AZƏRTAC-ın xüsusi müxbiri
Tbilisi
Bölmənin digər xəbərləri
