Türkiyədə COVID-19 daşıyıcılarının aşkarlanması üçün səyyar klinikalar fəaliyyət göstərəcək
İstanbul, 4 may, AZƏRTAC
Türkiyədə xroniki xəstəliklərdən əziyyət çəkən və risk qrupuna daxil olan, eyni zamanda, koronavirusla bağlı heç bir şikayəti olmayan vətəndaşların da COVID-19 testindən keçirilməsi planlaşdırılır.
AZƏRTAC xəbər verir ki, bunun üçün xüsusi ayrılmış səyyar klinikalar fəaliyyət göstərəcək.
COVID-19-la əlaqədar olaraq Türkiyədə xəstəxanalara müraciət edənlərin sayı azalıb. Hazırda tibb müəssisələrində müayinə nəticələri müsbət çıxan vətəndaşların son günlərdə yaxın ünsiyyətdə olduğu şəxslər testdən keçirilirlər. Mütəxəssislər isə xəstəliyin qarşısının tam alınması üçün gündəlik ən az 40 min nəfərin testdən keçirilməsinin vacibliyini vurğulayıblar. Bunun üçün səyyar klinikaların fəaliyyətə başlaması planlaşdırılır. Bu klinikalar vasitəsilə vətəndaşların işlədiyi yerlərdə də müayinələrin aparılması gözlənilir.
Hazırda Türkiyədə 120 COVID-19 laboratoriyası fəaliyyət göstərir. Onlardan ən böyüyü isə ölkənin Kocaeli şəhərinin Gebzə rayonunda qurulub. Bu laboratoriyada hər gün təxminən 5000 nəfər testdən keçirilir.
Günel Məlikova
AZƏRTAC-ın xüsusi müxbiri
İstanbul
Bölmənin digər xəbərləri
