TÜRKİYƏLİ QONAQLAR BAKI SLAVYAN UNİVERSİTETİNDƏ

14.06.2006 [23:35]
Çap et
A⁺ A^-

Bakı Slavyan Universitetinin Mətbuat xidmətindən AZƏRTAC-a bildirmişlər ki, iyunun 13-14-də Türkiyənin Ağdəniz Universitetinin prorektorları Mehmet Aktekin və Sadıq Çakmakçı, “Atatürk ilkeleri və inqilab araşdırma və uyqulama mərkəzi”nin müdiri Necdet Ekinci təhsil ocağının qonağı olmuşlar.

Görüşün ilk günü onlar burada fəaliyyət göstərən tədris-mədəniyyət Mərkəzində olmuş, müəllim-tələbə heyəti ilə görüşmüşlər. Mehmet Aktekin Ağdəniz Universiteti haqqında ətraflı məlumat vermişdir.

İyunun 14-də BSU ilə Ağdəniz Universiteti arasında qarşılıqlı əməkdaşlıq müqaviləsi imzalanmışdır. Həmin gün qonaqlar Qurtuluş gününə həsr olunmuş tədbirdə də iştirak etmişlər. BSU-nun tədris işləri üzrə prorektoru, professor Asif Hacıyev tədbiri açaraq Heydər Əliyevin şəxsiyyəti, Azərbaycan üçün gördüyü böyük işlərdən danışaraq Müstəqil Azərbaycanın da yaradıcısının məhz ulu öndərimiz olduğunu diqqətə çatdırmışdır.

Mehmet Aktekin Heydər Əliyev şəxsiyyətini Atatürk dühası ilə müqayisə etmiş, səfəri müddətində ümummilli liderimizin böyük sevgi və məhəbbətlə anıldığının şahidi olduğunu vurğulamışdır.

Tədbirdə Qurtuluş gününün tarixi əhəmiyyətindən və onun xalqımızın həyatındakı mühüm rolundan ətraflı söz açılmışdır.