TÜRKİYƏNİN BAŞ NAZİRİ MÜTƏŞƏKKİL CİNAYƏTKARLIQLA SONADƏK MÜBARİZƏ APARILACAĞINI BİLDİRMİŞDİR
AZƏRTAC-ın xüsusi müxbiri xəbər verir ki, bütün dünyada böyük əks-səda doğuran “Ergenekon” təhqiqatı ilə bağlı hakim Ədalət və İnkişaf Partiyasının parlamentdəki qrup toplantısında çıxış edən Baş nazir Rəcəb Tayyib Ərdoğan bu prosesləri İtaliyadakı mafiya əleyhinə məşhur “Təmiz əllər” əməliyyatına bənzətmişdir.
Türkiyədə mütəşəkkil cinayətkarlıqla mübarizənin sonadək davam edəcəyini bir daha vurğulayan Baş nazir demişdir ki, bir vaxtlar İtaliyada mafiyaya qarşı mübarizə aparılarkən cəmiyyətdə “bu cür əməliyyat bizdə nə zaman aparılacaqdır” çağırışları vardı. Bəzi qüvvələrin bundan narahat olması da anlaşılmazdır - deyən Rəcəb Tayyib Ərdoğan onu da əlavə etmişdir ki, “soyuq müharibə” dövründən qalan yanlış düşüncələr və qanundankənar hərəkətlərə artıq son qoyulmalıdır.
Bu arada, Türkiyənin hüquq mühafizə orqanları “Ergenekon” təhqiqatı üzrə iddianamənin iyulun 11-dək hazır olacağını bəyan etmişlər. “Sabah” qəzetinin yazdığına görə, iddianamədə keçmiş Baş nazir Tansu Çillərin qurduğu “Xüsusi Çillər dəstəsi”nin üzvü olan və bir çox cinayətlərdə, o cümlədən Azərbaycandakı OMON-çuların qiyamı kimi xatırladığımız uğursuz çevriliş cəhdində barmağı olan Osman Gürbüz və digərlərinin də adları vardır.
Bölmənin digər xəbərləri
