ÜÇ İLLİK FASİLƏDƏN SONRA PAKİSTAN PARLAMENTİ YENİDƏN İŞƏ BAŞLAMIŞDIR
Noyabrın 16-da Pakistan İslam Respublikasının parlamenti - Milli Assambleya üç illik fasilədən sonra öz işinə başlamışdır.
Azərbaycanın Pakistandakı səfirliyindən AZƏRTAC-a bildirmişlər ki, ölkənin prezidenti Pərviz Müşərrəf parlamentin açılışından bir saat əvvəl İslamabaddakı Prezident sarayında keçirilən təntənəli mərasimdə and içmişdir. Andiçmə mərasimindən sonra o, diplomatlarla görüşərkən, ölkəmizin İslamabaddakı səfiri Eynulla Mədətli Azərbaycan Prezidenti Heydər Əliyevin adından Pakistan Prezidenti Pərviz Müşərəfi salamlayaraq təbrik etmiş və dövlətimizin basçısının xoş arzularını yetirmişdir.
Həmin gün saat 11-də parlamentin binasında ilk iclasa toplaşan deputatlar kollektiv surətdə and içmişlər.
Mərkəzi Seçki Komissiyasının sədri məlumat vermişdir ki, noyabrın 18-də parlamentin növbəti iclasında spiker seçiləcək və hökumətin təşkilinə başlanacaqdır.
Xatırladaq ki, 342 nəfərlik Milli Assambleyanın 341 üzvü seçilmiş, boş qalan 1 yerə yenidən seçki keçiriləcəkdir. Deputatların 72 nəfəri qadındır.
Milli Assambleyada hökumətyönlü partiyaların təmsilçiləri 177 nəfər, müxalifətyönlü deputatlar 159 nəfər, bitərəflər isə 5 nəfərdir.
Bölmənin digər xəbərləri
