Ukrayna Milli Diplomdansonrakı Təhsil Tibb Akademiyasında Azərbaycan ilə əməkdaşlıq məsələləri müzakirə olunub
Tədbirdə Akademik Zərifə Əliyeva adına Beynəlxalq Elmi-Tibbi Mərkəzin rəhbəri, tibb elmləri doktoru, professor Aydın Salmanov iştirak edib.
Görüşdə tərəflər tibb elmləri, təhsil və səhiyyə sahəsində Azərbaycan ilə Ukrayna arasında əməkdaşlıq məsələlərini müzakirə ediblər. Onlar əməkdaşlığın əhəmiyyətini və yüksək səviyyədə olduğunu qeyd edərək elmi və tibbi kadrların hazırlanması, birgə layihələrin həyata keçirilməsi, konfransların təşkili, kadrların mübadiləsi və s. sahələrdə iki dost ölkə arasında əlaqələrin dərinləşməsi və genişlənməsi üçün böyük potensial olduğunu bildiriblər.
Rektor səfiri akademiyanın elmi-təhsil potensialı ilə tanış edərək tibb və səhiyyə sahəsində 1997-ci il 24 mart tarixli dövlətlərarası saziş çərçivəsində Azərbaycan ilə uzunmüddətli və qarşılıqlı faydalı əməkdaşlığa hazır olduğunu bildirib. Bundan başqa, o, səfirə deyib ki, akademiya 1918-ci ildə yaradıldığı vaxtdan indiyədək 400 nəfərdən çox Azərbaycan həkimi üçün “alma-mater” olub, indi isə Azərbaycandan olan 15 tibb işçisi bu akademiyada öz ixtisasını artırır.
Diplomatik nümayəndəliyin rəhbərinə, həmçinin bu akademiya ilə Ukraynadakı Akademik Zərifə Əliyeva adına Beynəlxalq Elmi-Tibbi Mərkəz arasında əməkdaşlıq haqqında saziş imzalanması barədə məlumat verilib. Sazişin imzalanmasının məqsədi səhiyyə sahəsində əməkdaşlığı dərinləşdirmək və genişləndirməkdir.
Akademik Y.Voronenko tanınmış oftalmoloq alim, akademik Zərifə Əliyevanın adını daşıyan Beynəlxalq Elmi-Tibbi Mərkəzin fəaliyyətini bəyəndiyini və bu Mərkəzin layihələrinin həyata keçirilməsində akademiyanın iştirakını təmin etməyə hazır olduğunu bildirib. Onun fikrincə, birgə Azərbaycan-Ukrayna elmi-praktik jurnalının yaradılması və nəşr olunması, tibb elmləri, təhsil və səhiyyə sahəsində akademik Zərifə Əliyeva adına beynəlxalq mükafatın təsis edilməsi, akademik Zərifə Əliyeva adına birgə elektron elmi-tibbi kitabxananın təşkili, habelə alimlərin Azərbaycan-Ukrayna forumunun keçirilməsi daha aktual birgə layihələrdir.
Azərbaycan diplomatı səmimi görüşə görə, uzunmüddətli və qarşılıqlı faydalı əməkdaşlığa hazır olduğuna, habelə akademik Zərifə Əliyeva adına Beynəlxalq Elmi-Tibbi Mərkəzin həyata keçirdiyi birgə layihələri dəstəklədiyinə və bu layihələrdə iştirak etdiyinə görə rektora minnətdarlığını bildirib. Səfir öz növbəsində görüş iştirakçılarına Azərbaycan Respublikasının sosial-iqtisadi inkişafı, genişmiqyaslı infrastruktur layihələrin həyata keçirilməsi, o cümlədən xəstəxanaların, tibb mərkəzlərinin tikilməsi, habelə onların müasir tibbi avadanlıqla təchiz olunması barədə məlumat verib.
Diplomatik nümayəndəliyimizin rəhbəri, həmçinin qeyd edib ki, Azərbaycan tərəfi birgə elmi-tibbi jurnalın həmtəsisçisi olmağa hazırdır. O, həmçinin yaxın vaxtlarda profil təsisatlar arasında müvafiq saziş imzalanacağına əminliyini bildirib. Səfirin qənaətinə görə, bu cür birgə layihənin həyata keçirilməsi Azərbaycanın profil təsisatlarının P.L.Şupik adına Ukrayna Milli Diplomdansonrakı Təhsil Tibb Akademiyası ilə sıx və uzunmüddətli əməkdaşlığına kömək göstərəcəkdir.
Professor Aydın Salmanov AZƏRTAC-a müsahibəsində Ukraynada akademik Zərifə Əliyeva adına Beynəlxalq Elmi-Tibbi Mərkəzə hərtərəfli yardım göstərilməsində Azərbaycanın Ukraynadakı səfirliyinin böyük rolu olduğunu qeyd edib, Mərkəzin azərbaycanlı və ukraynalı həmkarlarla tərəfdaşlıq əlaqələrinin genişlənməsi və dərinləşməsinə kömək göstərdiyinə görə diplomatik nümayəndəliyimizə təşəkkürünü bildirib.
Zeynal Ağazadə
AZƏRTAC-ın xüsusi müxbiri
Kiyev
Bölmənin digər xəbərləri
