UKRAYNA QANADLI RAKETLƏRİ VƏ STRATEJİ BOMBARDMANÇI TƏYYARƏLƏRİ MƏHV ETMƏYƏ BAŞLAYIR
ABŞ-ın maliyyələşdirdiyi tərksilah proqramına uyğun olaraq, Ukrayna “hava-yer” tipli 225 ədəd X-22 qanadlı raketin sökülməsinə başlayır. Onlardan birincisi noyabrın 6-da Jitomir vilayətindəki Ozyornoye hərbi aerodromunda doğranacaqdır.
Noyabrda Nikolayev və Poltava vilayətlərindəki aerodromlarda yerləşdirilmiş Tu-22M tipli 31 strateji bombardmançı təyyarə də məhv ediləcəkdir.
İTAR-TASS-ın verdiyi xəbərə görə, ümumiyyətlə, ilin sonunadək Ukrayna 6 bombardmançı təyyarəni və 30 ədəd qanadlı raketi məhv edəcəkdir. Strateji hücum silahlarının azaldılması haqqında müqavilələrin həyata keçirilməsinin təmin edilməsi mərkəzinin rəisi İqor Mtyayevin dediyinə görə, bu prosesi 2004-cü ildə başa çatdırmaq planlaşdırılır. Bundan əvvəl Ukrayna 8 ədəd Tu-22M, 11 ədəd Tu-160 və 27 ədəd Tu-95MS təyyarəsini, habelə təyyarələrdə yerləşdirilən X-55 tipli 483 ədəd qanadlı raketi məhv etmişdir.
ABŞ nüvə tərksilahı haqqında 1993-cü il tarixli ikitərəfli saziş çərçivəsində Ukraynaya strateji silahların məhv edilməsində yardım göstərir.
Bölmənin digər xəbərləri
