UKRAYNA TƏLƏBƏLƏRİ AZƏRBAYCAN DİLİNİ MƏMNUNİYYƏTLƏ ÖYRƏNİRLƏR

28.08.2003 [19:03]
Çap et
A⁺ A^-

AZƏRTAC-ın xüsusi müxbiri xəbər verir ki, avqustun 27-də T.Q.Şevçenko adına Kiyev Milli Universitetinin şərqşünaslıq kafedrasında Azərbaycan dili və ədəbiyyatı sahəsində ixtisaslaşan doqquz tələbənin Bakıya göndərilməsi məsələsinə həsr olunmuş iclas keçirilmişdir. Kiyevli tələbələri dil sahəsində təcrübə keçmək üçün Azərbaycan paytaxtına Bakı Dövlət Universiteti dəvət etmişdir.

Kiyev Universitetinin şərqşünaslıq kafedrasının müdiri, professor Qriqori Xalimonenko, həmin kafedranın dosenti Fərhad Turanlı və ölkəmizin Ukraynadakı səfirliyinin əməkdaşı Seyidəli Qədiməliyev Azərbaycan dilinin öyrənilməsində tələbələrə uğurlar arzulamışlar.

Bakıda Kiyevli qonaqlar nəinki mehmanxanada pulsuz yer və üçdəfəlik yeməklə təmin ediləcəklər, həm də onlara təqaüd veriləcəkdir.

Tələbələr BDU-nun rektoru A.Məhərrəmova, Azərbaycanın Kiyevdəki səfiri T.Əliyevə, “Azərbaycan Hava Yolları” Dövlət Konserninin Ukraynadakı baş nümayəndəsi Y.Əmirova və başqalarına kömək və diqqətə görə minnətdarlıqlarını bildirərək, təcrübə zamanı Azərbaycan dilini mükəmməl öyrənəcəklərinə söz vermişlər.

Avqustun 28-də Bakıya yola düşən tələbələr Kiyevə yalnız yeni il ərəfəsində qayıdacaqlar.